Las celebracions d'enguan comencèren dab un acte politic a Sent Joan lo Vielh organizat per totas las fòrças de l'esquèrra abertzale illegalizadas e legaus: Eusko Alkartasuna, Aralar, Abertzaleen Batasuna e Alternatiba. A l'acte s'i presentèt la declaracion "Patz e Libertat" qu'avèva com amira de presentar la jornada nacionau basca com un acte d'unitat dens l'encastre de tot lo procès de patz. Que brembèren tanben qu'en 2012 se rembremban los 500 ans de la conquista de Navarra per Castilha e lo 26 d'abriu se commemoraràn los 75 ans deu bombardament de Gernika.

 

La manifestacion de dimenge a Pamplona amassèt mei de 16 000 personas, çò que representèt una clara mòstra d'unitat de l'esquèrra independentista. Se brembèt tanben qu'en 2004, la polícia empachèt a Arnaldo Otegi e los autres militants de desplegar la banderòla e desfilar dens lo cap-lòc istoric de Navarra. Totun, çò de mei remarcat es la navèra èra poltica que comença dab la fin de l'activitat armada d'ETA e l'unitat de l'esquèrra abertzale a las eleccions de 2011 dab hòrt de succès: son la fòrça dab mei de representativitat municipau.

 

Com cada annada lo Partit Nacionalista Basco (PNB) organisèt lo son acte politic a Bilbao dab mei de 2000 militants e simpatisants. Iñigo Urkullu, president deu partit, anoncièt que l'amirau es de ganhar las eleccions de l'an que vien.

 

Deu son costat lo Partit Socialista d'Esukadi, per l'intermediari deu son porta-paraula José Antonio Pastor, rebrembèt que desempuish la fin de l'activitat armada d'ETA lo son partit es, adara, per una "flexibilizacion" de la politica penitenciària. Lo Partit Popular demanda au PNB de "dirigir las soas exigéncias a ETA-Batasuna" e non pas au govèrn. 

Eric Goyhenne