Lo setmanièr rus Novaya Gazeta, que desvelèt fa qualques jorns la persecucion, detencion e desaparicion massissa d’òmes gais en Chechenia, rapòrta ara la creacion d’un camp de concentracion per omosexuals dins una anciana basa militar de la vila d’Argun. Los detenguts los someton a d’interrogatòris violents e los obligan,  jos la tortura, de donar los noms e las coordenadas d’autres omosexuals. Lo setmanièr publica de testimoniatges esfraioses que parlan de còps, de descargas electricas, de mòrts e quitament d’extorsions a las familhas dels detenguts, que pagarián de rescats.
 
Segon Novaya Gazeta, lo quite pòrtavotz del Parlament de Chechenia auriá vesitat l’installacion.
 
La gaseta russa, ont i trabalhèt Anna Politkovskaia, rapòrta que l’istòria comencèt quand lo grop d’activistas Gay Russia demandèt la permission per una desfilada de la Fiertat LGTB dins quatre vilas de Chechenia. E mai se los activistas sabián que las autoritats o refusarián, o demandèron per s’assolidar d’aquel refús e poder denonciar las discriminacions que se patisson per orientacion sexuala davant lo Tribunal Europèu de Dreches Umans. En aquel moment, totjorn segon Novaya Gazeta, Putin auriá ordenat que la polícia comencèsse de far una arrestacion massissa de personas omosexualas, que las auriá identificadas per mejan dels rets socials. O nomenan “netejatge preventiu”.
 
Los activistas LGTB creson qu’es urgent d’evacuar del país totas las personas omosexualas, bisexualas o transsexualas.
 
Lo Parlament Europèu, lo Departament d’Estat estatsunidenc e las autoritats britanicas an condemnat l’omofobia del govèrn chechèn, dirigit per Ramzan Kadyrov, e an exigit del Kremlin que realize una enquèsta per saber amb certitud qu’es çò que se passa e qual es lo responsable. Lo govèrn de Moscòu s’engatgèt a menar a bon tèrme aquela enquèsta, mas sembla qu’aquel engatjament servís pas per res.
 
 
Un país omofòb
 
Chechenia es governada dirèctament per Ramzan Kadyrov, acusat internacionalament de divèrsas violacions dels dreches umans. Dins aquel país cap se tolèra pas cap d’orientacion sexuala ni cap d’identitat de genre fòra la tradicionala eteronormativitat. En mai d’aquò, Russia contèsta pas brica tota aquela politica omofòba.
 
Dins aquel sens, lo pòrtavotz del govèrn chechèn, Ali Karimov, a refusat las acusacions desveladas per Novaya Gazeta en afirmant qu’es pas impossible que la polícia aja arrestat d’omosexuals pr’amor qu’en Chechenia n’i a pas. Exactament diguèt: “Es impossible de secutar çò qu’existís pas dins la Republica. Se i aviá de mond aital, las fòrças de la lei se’n deurián pas preocupar, car serián lors pròprias familhas que se cargarián de los mandar a un endrech que ne tornèsson pas mai”.
 
 
Un país militarizat leial a Putin
 
Òme leial a Vladimir Putin, Ramzan Kadyrov es un dels personatges mai importants e sorns de la Federacion Russa e de l’istòria de Chechenia, una republica autonòma qu’a la particularitat d’èsser la sola amb son armada pròpria, un grop armat privat conegut coma los “kadyrovsky” o òmes de Kadyrov, compausat per de mercenaris de mai d’una origina.
 
Curiosament èran per l’independéncia dins la primièra guèrra de Chechenia, una guèrra sens cap de connotacion religiosa qu’afrontava de nacionalistas russes e d’independentistas chechèns. Pasmens, quand arribèt lo comandant jihadista saudita Ibn Al Jattab qu’ensagèt d’espandir lo wahhabisme entre los “kadyrovsky”, eles reconsiderèron lors tèsis e preferiguèron de venir leials a la Federacion Russa e a Vladimir Putin que non pas de luchar per venir una republica islamista segon l’estil de l’Afganistan dels talibans. En contrapartida de sa leialtat a Russia, Kadyrov a obtengut fòrça poder.