Deth 1r ath 4 de noveme era Val de Aran que vierà era sedença der European Mountain Meeting (EMMeet), un eveniment que nèish damb era volontat d'èster un referent en mon dera montanha, ce rapòrte eth web dera estacion d'esquí aranesa Baqueira-Beret.

Er EMMeet qu'ei congrès qu'amassarà as melhors alpinistes, escaladors e esportistes de montanha, coma Edurne Pasaban, Simone Moro, Denis Urubko, Leo Houlding e plan d'auti. Dilhèu que cau soslinhar era preséncia Sebastián Álvaro, Alex Txikon, Carlos Suárez, Mirèia Miró, era còlha de Proyecto Alas (Álvaro Bultó, Santi Corella, Toni López e Vicent), Manu Córdova, Chris McDouggal, Ezequiel Troncoso, Kapi Bloga etc.
 
Es assistents que poderàn participar en conferéncies, exibicions, projeccions… tot completat damb gessudes tecniques ena montanha guidades per Edurne Pasaban, Leo Houlding e Denis Urubko.
 
Toti es participaires d'aqueres jornades que poderàn gaudir d'ua exibicion de saut base dera man de Proyecto Alas e der arreconeishut sautaire australian Chris McDougal, Douggs. Ath delà, era esquipa Boreal qu'amiarà a tèrme ua demostracion d'escalada e ua auta slackline e de highline.
 
En programa der EMMeet qu'auràn especiau importància es projeccions d'Autana, Next Time Inshallah e Aran In Edit que transmet era esséncia des Pirenèus.
 
Que se i debanarà tanben ua competicion de boulder e un debat sus eth passat, eth present e eth futur deth montanhisme.