Lo president palestinian, Mahmud Abbas, tornèt ièr a l’Assemblada Generala de l’ÒNU per demandar l’admission coma estat non membre, amb l’idèa de demostrar al Mond que Palestina es “un estat jos ocupacion”. Segon Abbas, aquela demanda a la majoritat assegurada pr’amor que i a 133 païses favorables, en comptar la Liga Aràbia e lo Movement dels Païses Non Alinhats, amb 120 membres.

Mas sembla que los Estats Units an menaçat amb lo vèto, e mai se lo president palestinian l’esperava pas abans las eleccions estatsunidencas de novembre.
 
En mai d’aquò, lo president d’Israèl, Avigdor Lieberman, acusa lo govèrn palestinian de “terrorisme diplomatic” e demanda lo boicòt internacional de Palestina.
 
Mentretant, Mahmud Abbas critica los candidats dels Estats Units, tant Obama coma Romney, per aver declarat que Jerusalèm es la capitala d’Israèl.
 
Cossí que siá, la demanda palestiniana arriba en un moment de commocion sociala en Cisjordania, amb de protèstas contra l’aumentacion de las taxas e la crisi economica. E Mahmud Abbas, qu’a demandat de calma a la populacion, sosten las mobilizacions, perque segon el, “i aurà pas de solucions fins que s’acabe l’ocupacion”.
 
Arunan, Palestina demandèt l’intrada coma estat de plen drech al Conselh de Seguretat de l’ÒNU, mas la demanda capitèt pas a causa de la menaça de vèto de Washington.