Dimars, comencèt al Parlament de Catalonha, amb l’anonci d’eleccions avançadas de dos ans, lo debat de politica generala. Lo debat s’acabèt ièr amb la dissolucion del Parlament, que se tornarà constituir segon los resultats de las eleccions del 25 de novembre que ven.
 
Pendent lo debat, lo president Artur Mas precisèt que, dins la legislatura que ven, se farà un referendum d’autodeterminacion, quitament s’es illegal segon lo govèrn espanhòl. Mas apondèt que lo modèl prepausat es pas aquel de Puerto Rico (estat associat als Estats Units) e que “Catalonha vòl far partida d’una federacion europèa amb los meteisses dreches e devers que Danemarc, Eslovènia, los Païses Basses, Finlàndia, Estònia, Letònia o Lituània”.
 
 
Referendum per l’autodeterminacion
 
Lo debat parlamentari s’acabèt ièr amb lo vòte d’una resolucion sus un referendum per l’autodeterminacion, presentada per CiU e ÈRC, amb lo sosten d’ICV-EUiA e SI. La resolucion, que podètz veire sul document çai jonch, reconeis e saluda l’enòrma manifestacion de l’11 de setembre, soslinha que pendent 30 ans se faguèt d’esfòrces inutils per conviure dins l’Estat espanhòl, e que Catalonha deu iniciar la siá transicion nacionala basada sul drech de decidir. La resolucion demanda al Parlament de trabalhar sul dialòg amb la comunautat internacionala e l’Union Europèa, e constata que lo pòble a besonh de decidir del sieu futur. Per aquò far, demanda al govèrn de menar una consultacion per que los catalans pòscan decidir. La consultacion se deu far prioritàriament pendent la legislatura que ven.
 
La resolucion foguèt aprovada amb 64,44% dels vòtes. Votèron contra 15,56% dels deputats, del temps que 20% dels deputats s’abstenguèron.
 
 
De representants internacionals al Parlament
 
Los representants diplomatics dels consolats d’Alemanha e dels Estats Units foguèron a la tribuna dels convidats del Parlament de Catalonha, e prenguèron de nòtas suls debats. I aviá tanben lo deputat quebequés Alain Therrien, en qualitat d’assessor parlamentari del ministre de las Relacions Internacionalas de Quebèc.
 
Quant als mèdias internacionals, i aguèt al Parlament lo jornal occitan francofòn Sud Ouest, Al Jazira, las agéncias France Press, Associated Press e Reuters, lo jornal La Presse de Quebèc, lo neerlandés Volkskrant, Proceso de Mexic, la ràdio francesa Europe 1, l’agéncia d’imatges Getty, Deutsche Welle, The Times e lo Wall Street Journal.
 
 
Menaças d’Espanha
 
Las menaças d’Espanha se faguèron ausir. Cal soslinhar l’editorial de El Mundo que demandèt que lo govèrn espanhòl arrestèsse Artur Mas.
 
Del sieu costat, la secretària generala del Partit Popular, en nom del govèrn d’Espanha, declarèt ièr que lo govèrn espanhòl “emplegarà totes los instruments qu’aja per empedir qu’Artur Mas comete una illegalitat”. Dins aquel sens, a manifestat que pensan de reclassar coma delicte la convocacion de consultacions sus l’independéncia.