Lo candidat socialista François Hollande es lo venceire del primièr torn de las eleccions presidencialas francesas, mas la justesa amb la qu'a superat lo conservator Nicolas Sarkozy, farà que lo segond torn venga una jornada determinanta sens un favorit incontestable de primas. Lo candidat del PSF a amassat un sosten electoral de gaireben 29% dels sufragis, del temps que lo presidenciable de l'UMP a demorat a pauc mens de 27% dels vòtes. Malgrat que qualques sondatges parlan ja d'una victòria d’Hollande al segond torn, en vesent aquel resultat talament ajustat caldrà far plan atencion a las consignas dels autres partits e al comportament electoral dels votants dels autres candidats.

Coma d'abitud dins las nuèches electoralas, lo Front Nacional rejovenit per Marine Le Pen a portat l'estonament en arribant fins gaireben 20% dels vòtes, çò que plaça aquel partit en tresena posicion per darrièr del president de la Republica. Amb aquel percentatge talament naut, que supèra totes los resultats precedents atenguts pel sieu paire Jean Marie Le Pen (faguèt 16,8% en 2002), la consigna que pòsca donar Marine Le Pen als sieus seguidors pòt èsser clau al segond torn electoral.

Per darrièr de Le Pen demorèt lo radical d’esquèrra Jean-Luc Melenchon, qu'amassèt un notable 11,7% dels vòtes. Del sieu costat, un dels candidats mai ben avalorats per l’opinion publica, lo centrista François Bayrou, es estat fisèl al sieu malefici electoral en tot superar pas 10% dels sufragis. Atrapat entre los dos grands partits e amb una basa electorala absorbida pel vòte util, lo candidat del MoDem demorèt en cinquena posicion. La candidata ecologista e regionalista Eva Joly a fach lo resultat que predisián los sondatges e a arribat pas quitament a 2,5% dels vòtes.

Fin finala, lo secretari general de la CGT a Blancafòrt e representant del Nòu Partit Anticapitalista, Philippe Potou, a pas arribat a 2%. I son tanpauc arribats Nicolas Dupont-Aignan de Depès la Republica, Jacques Cheminade, de Solidaritat e Progrès e Nathalie Arthaud de Lucha Obrièra.

Lo vòte en Occitània a agut los meteisses paramètres qu'en la majoritat d’eleccions, amb un vòte majoritari pel candidat socialista e un fòrt sosten electoral al Front Nacional. Ça que la, coma d'abitud, dins qualques departaments, mai que mai en Provènça, lo ganhaire foguèt Sarkozy, malgrat qu'en general pas gaire luènh del candidat socialista. La granda excepcion de la mapa electorala occitana es estat lo departament de Gard, ont s'impausèt la candidata d'ultradrecha Marine Le Pen coma vencedora, qualques decimalas per davant Sarkozy.

Als territòris de las autras minoritats nacionalas s'impausèt tanben lo candidat socialista, exceptat Corsega, Alsàcia e Savòia, ont lo clar venceire foguèt Sarkozy. Per contra, los bretons, los catalans, los bascos e los flamencs an seguit lo comportament electoral occitan en causir majoritàriament Hollande.