Lo govèrn de la Generalitat de Catalonha assegura qu’ongan se tendrà un referendum per l’independéncia, del temps que lo govèrn de l’estat espanhòl assegura que o permetrà pas jamai. Dins aquel encastre, cossí se poiriá menar a bon pòrt aquel vòte? Sembla qu’una de las estrategias serà de paralisar la repression espanhòla.

Totes los compausants del govèrn de la Generalitat de Catalonha signèron divendres passat un document ont manifestavan lor engatjament pel referendum d’independéncia de Catalonha e Aran. A mai, amb aquela signatura los dos centenats de representants politics se fan eles totes responsables d’aquel prètzfach. “Nos engatjam a organizar, convocar e efectuar un referendum en responsa al mandat democratic qu’avèm recebut dels ciutadans”, çò ditz lo document.
 
Amb aquel acte, se l’estat espanhòl contunha son estrategia de denonciar en justícia e declarar inelegibles los elegits responsables d’un vòte independentista, l’estat deurà jutjar e declarar inelegibles mai de 200 elegits, o benlèu qualque milierat, car es prevista l’adesion de la majoritat dels cònsols màgers e conselhièrs municipals del país.
 
Lo president de la Generalitat, Carles Puigdemont, assegurèt que lo govèrn afortissiá solemnament sa determinacion de convocar e far lo referendum, e remembrèt que la majoritat dels catalans vòlon votar sus l’avenidor politic del Principat. Expliquèt que la preparacion, la convocacion e l’execucion del vòte se farián collectivament, ansin coma totas las autras accions del procès independentista.
 
Aquela eveniment seguissiá un acte que s’èra tengut dimècres al Parlament de Catalonha en sosten a sa presidenta, Carme Forcadell, e als autres elegits independentistas perseguits per la justícia espanhòla. En aquela escasença, totes los elegits, e los èx-presidents del Parlament, manifestèron lor supòrt e critiquèron la judiciarizacion del procès politic catalan de la part de l’estat espanhòl.
 
 

▶️ President @krls: "avui #Govern referma la determinació a preparar i celebrar el referendum volgut per la gran majoria societat catalana" pic.twitter.com/YrR6lx9kqm

— Govern. Generalitat (@govern) 21 d’abril de 2017

 

▶️ #Vicepresident@Junqueras “L’organització del #referèndum és un mandat democràtic de la ciutadania i estem compromesos a exercir-lo” pic.twitter.com/UCwcFWRhzO

— Govern. Generalitat (@govern) 21 d’abril de 2017