Lo dijòus 27 de setembre passat, qualques 50 000 personas manifestèron dins las principalas vilas de Grècia en la primièra cauma generala contra lo govèrn d’Antonis Samaras, que prenguèt lo poder en junh. Los transpòrts, los espitals, las botigas e las escòlas foguèron paralisats en granda partida. Quitament los toristas trobèron l’Acropòli d’Atenas barrada. Lo seguiment foguèt majoritari.

Las protèstas èran per exprimir lo malèsser de la populacion contra lo nòu plan de reduccions budgetàrias d’11,5 miliards d’èuros, necessari per recebre mai de prèstes de l’estrange. Los tres partits que govèrnan son a negociar amb los creditors internacionals per decidir ont cal redusir lo budget.
 
La manifestacion d’Atenas s’acabèt amb cinquanta arrestats e fòrça ferits.
 
E mentre que i aviá de susmautas en Atenas, lo primièr ministre grèc, Antonis Samaras, e lo ministre de las Finanças, Giannis Stournaras, s’acordèron sus lo plan de  mesuras d’estalvi que lor exigisson los sòcis europèus e lo Fons Monetari Internacional (FMI), per fin que lo país pòsca accedir a mai de crèdits.
 
L’acòrdi que Samaras auriá fixat amb Stournaras tendriá doas partidas: una tocant la reduccion dels 11,5 miliards d’èuros e l’autra tocant los 2 miliards d’èuros, en nòus recobraments que vendràn de la lucha contra l’evasion fiscala e d’una reforma del sistèma de las taxas.