An condemnat a 15 jorns de preson un òme per aver panat un paquet de salsissas, de pastissons e una brústia de las dents. Lo condemnat es un òme sens papièrs d’aperaquí trenta ans e lo jutgèron en correccionala diluns passat a Bordèu, çò rapòrta Sud Ouest.
 
“Se vos donatz nada explicacion, es dificil de reténer l’estat de necessitat plaidejat peu vòste defensor. En restant mut avetz sarrat la branca sus la quau ètz assetat” çò disiá lo jutge Alain Reynal.
 
Son avocata soslinhèt que lo montant del prejudici es d’“a pena 20 èuros”. A mai “qu’a hèit aquò pr’amor qu’avè hami. La pròva: quand se hèc préner, se lancèt suus paquets per los dubrir e minjar. Çò qu’ei estat retengut coma de degradacions”, çò s’escanèt de dire ela.
 
Lo ministèri public demandava tres meses de preson ferma, en fasent notar una circonstància agravanta qu’abandonèt: l’òme èra estat en preson entre fin de març e lo 22 d’abril per lo meteis delicte, e ara, en recidiva e a causa de sa situacion irregulara lo poirián expulsar de l’estat francés.
 
L’òme, que ditz qu’es originari de Còngo, mas aquel país lo reconeis pas coma un de sos ciutadans. Viu dins l’estat francés dempuèi 5 ans e i vòl totjorn demorar. “Los drets de l’òme disen que tot indiviú a lo dret de víver on se sent en patz”, çò precisèt lo condemnat.