Descobriguèron en 1913, dins lo sit arqueologic de Pompèi, doas personas petrificadas a causa de l’erupcion de Vesuvi en l’an 79 après lo Crist. Coma las doas personas èran demoradas abraçadas, foguèron nomenadas coma “los amoroses de Pompèi”. Se cresiá qu’èran doas filhas o ben un parelh d’un òme e una femna. Ara, de scienficics an descobèrt que s’agís de dos òmes.
 
Un grop de scientifics dirigit pel professor Stefano Vanacore a descobèrt que son dos gojats de 18 e 20 ans, gràcias a una analisi de lor ADN mejançant una tecnica nomenada tomografia axiala per ordenador. En mai d’aquò, lo resultat de l’analisi assegura qu’èran pas de la meteissa familha.
 
Las rèstas petrificadas dels ciutadans de Pompèi nos permeton de conéisser un pauc mai la vida vidanta d’aquela ciutat romana que s’arrestèt còp sec en l’an 79 a causa de l’erupcion de Vesuvi. Aquela erupcion ejectèt una nívol de pèiras, cendres e fums a una nautor de 15 a 30 km, e escopiguèt de lava e de pèira esponga embrenicada en quantitat de 1,5 milions de tonas per segonda, en produsent fin finala cent mila còps l'energia termica de la bomba atomica d'Hiroshima. S'estima que 16 000 personas moriguèron a causa dels fluxes piroclastics idrotermals. Lo sol testimoniatge de l'eveniment consistís en doas letras de Plini lo Jove adreiçadas a l'istorian Tacit.