Uèch sindicats bascos convoquèron una cauma generala al Bascoat Sud. Los principals sindicats estatals, CCOO e UGT, i participèron pas.

Uèch sindicats e un centenat d’organizacions socialas del Bascoat cridèron a la cauma generala contra las reduccions budgetàrias del govèrn espanhòl. Aquelas organizacions avián per tòca de quichar las institucions bascas per qu’apliquèsson pas la politica marcada pel govèrn de Rajoy. Ça que la, los dos principals sindicats estatals, CCOO e UGT, s’apondèron pas a la mobilizacion.
 
Los sindicats ELA, LAB, ESK, STEE-EILAS, EHNE, Hiru e CGT-LK foguèron los convocaires d’aquela mobilizacion. Lo secretari general d’ELA, Adolfo Muñoz, soslinhèt que “la mobilizacion e la cauma generala son mai necessàrias que jamai”. STEE-EILAS soslinha que la prioritat del govèrn espanhòl “contunharà d’èsser de redusir per poder complir lo taus de deficit” e que la despensa en educacion “s’es redusida de 500 èuros per escolan dins la comunautat autonòma basca e de 1000 èuros en Navarra”.
 
Entre las accions menadas a tèrme, lo sindicat de transportaires Hiru organizèt de piquets informatius a Armiñon e Irun, sus la frontièra entre Espanha e França. L’intencion d’aquela accion èra d’exigir un plan de salvament pel sector, que se tròba dins una situacion grèva. Al delà, als trabalhadors de l’Agéncia Navarresa d’Emergéncias lor calguèt far de servicis minims e, per aquò, donaràn lo salari del jorn a l’Assemblada dels Caumaires de Navarra e a un refectòri social.
 
De manifestacions se debanèron a Sant Sebastian, Bilbao, Vitòria e Irun.