L’Hamas accèpta un estat palestinian amb las frontièras de 1967, çò rapòrta Al Jazira. Lo dirigent de l’organizacion palestiniana, Khaled Mashal, presentèt ièr diluns 1r de mai lo nòu document politic que renovèla la carta de l’organizacion trenta ans après sa fondacion.
 
La modificacion pus significativa d’aquela renovelacion ideologica es que l’Hamas accèpta las frontièras qu’existissián abans la Guèrra dels Sièis Jorns de 1967, abans qu’Israèl ocupèsse Cisjordania, la lista de Gaza e lo Golan sirian. Dins aquel sens, e mai s’insistís que reconeis pas explicitament l’estat d’Israèl, en practica la reconeissenca es implicita.
 
Una autra modificacion de soslinhar es qu’ara l’Hamas definís lo conflicte contra Israèl coma un conflicte politic e non pas religiós, pus concretament se posiciona contra “las fòrças d’ocupacion” e non pas contra los “josieus”. D’aquela passa, l’organizacion palestiniana suprimís lo ton “antisemita” de sa carta ideologica que l’estat israelian a totjorn criticat.
 
De remarcar tanben qu’Hamas se definís ara coma una organizacion “independenta” dels Fraires Musulmans. Aquel cambiament lor permet de se raprochar de l’Egipte governada per Abd Al Fatah Al Sisi que considèra que los Fraires Musulmans son un grop terrorista enebit e perseguit.
 
Aqueles cambiaments se produson en consequéncia del nòu contèxt de l’Orient Mejan, plan diferent del que i aviá dins los ans ochanta, e poirián seguir una demanda de qualques govèrns sunnitas de la region coma l’Arabia Saudita o Qatar. De tot biais, es pauc probable l’Israèl modifique sa posicion per rapòrt a Hamàs.
 
Aquel document l’an discutit dempuèi quatre ans, e modifica la carta del movement politicoreligiós palestinian que ten lo govèrn de la lista de Gaza, despuèi que foguèt elegit en 2006 per majoritat absoluda. En aquel moment Hamas prepausèt als Estats Units una trèva de cinquanta o cent ans, qu’interessèt pas l’estat d’Israèl.
 
Ara, la direccion d’Hamas espèra que la reforma de sa carta constituenta facilitarà un raprochament de l’organizacion amb los actors principals de la region e del Mond en general, que se n’èran alonhats per la non-reconeissença de l’estat d’Israèl.