An començat una campanha a Barcilona de Provença (Ubaia) per demandar que s’expulse pas los refugiats que se tròban dempuèi novembre passat en aquela vila dels Alps occitans.
 
Sièis d’aquelas personas, qu’an trobat en Occitània un refugi de la guèrra e de la terror, son expulsablas devèrs l’estat italian e lors demandas d’asil seràn pas instruchas dins l’estat francés, a causa de la Directiva Dublin, una lei europèa que sa tòca es de “racionalizar las sollicitacions d’asil”. Las rasons de las expulsions basadas sus aquela lei las an pas compresas los activistas d’Ubaia, ni mai la redaccion de Jornalet.
 
Mhireteab, Habtom, Gébré, Abdelazim, Yasser e Abdelmahmoud se tròban dempuèi sièis meses en Ubaia, ont an agut un bon aculhiment e an pogut començar de se reconstruire “entornejats de bònas volontats e dau formidable vam de generositat dont nòstra valaa es capabla”, çò ditz la còla de Solidaritat Ubaia. Aquel grop, e mai se fa sa campanha principalament en francés, emplega la lenga occitana dins son nom.
 
Los expulsables son sièis joves que fugiguèron lor país en guèrra e qu’an agut l’astre d’arribar en cò nòstre sens daissar lors vidas sul camin coma tantes autres. A l’ora d’ara, “lor integracion a las divèrsas activitats es remarcabla, e pausa ges de problèma, totes los abitants de Barcilona ne son testimònis”, çò dison.
 
Per aquela rason, la còla de Solidaritat Ubaia a lançat una campanha sus Change.org en tot demandar al prefècte del departament dels Alps de Nauta Provença, que n’a la possibilitat, e a las autoritats de l’estat francés de tornar sus “aquela decision absurda, crusèla e inumana”.
 
 

---

— Sit web de Change.org per signar la peticion
— Sit web de Solidaritat Ubaia