Lo dialòg de las culturas popularas d’Occitània e dels Païses Catalans s’es mes en marcha a Besièrs. Se presentèt al CIRDÒC lo 9 de mai passat, a l’ocasion de la jornada d’Euròpa, lo projècte “Culturas popularas en dialòg”. S’agís d’un programa que convida associacions, confrariás, clubs, artistas e grand public a devenir los ambaissadors de las culturas occitana e catalana en partejant de vidèos, imatges e testimoniatges sus la pagina Facebook del projècte amb l’etiqueta #CulturaViva.
 
Lo projècte es menat a bon tèrme per un partenariat entre lo CIRDÒC, la Fira Mediterrània de Manresa e la Fira de Teatre Infantil de las Illas Balearas.
 
 
Exposicion sus las fèstas de fuòc
 
Durant l’inauguracion del projècte, e al son de las musicas del grop Mar e Montanha, se presentèt l’exposicion “Fèstas de Fuòc dins los Pirenèus”, concebuda per la Generalitat de Catalonha amb lo sosten de l’UNÈSCO, que se poirà vesitar durant tot un an a la Mediatèca Occitana. L’exposicion mòstra los fuòcs de Sant Joan de divèrsas vilas dels Pirenèus declarats per l'UNÈSCO patrimòni de l’umanitat; 36 comunas son en Occitània (en Comenge e Aran), 14 al Principat de Catalonha, 9 en Aragon e 3 en Andòrra.
 
 
Segond Fòrum Euroregional
 
L’exposicion serà dobèrta durant 12 meses, e durant aquel periòde se tendrà de rescontres, d’escambis e de manifestacions culturalas qu'alestiràn lo forum final. A aquela ocasion los elegits de la region qu’a pres lo nom d’Occitània, de la Generalitat de Catalonha e lo CIRDÒC anoncièron la tenguda d’un segond Forum Euroregional, qu'aurà luòc en Occitània a la prima de 2018.
 
Lo rendètz-vos que ven se tendrà a Pesenàs (Besierés) lo 1r e lo 2 de julhet amb la Ronda dels Totèms.