Actualitats
80 000 personas manifèstan a París contra las politicas d’austeritat europèas
Las protèstas contra las politicas d’austeritat impausadas per l’Union Europèa, que se debanan pertot en Euròpa, son tanben arribadas a París (França); ièr dimenge, 80 000 personas, segon los organizaires, manifestèron contra aquelas reduccions budgetàrias. S’agís de la primièra granda protèsta dempuèi la direccion socialista de François Hollande.
La manifestacion arriba dos jorns abans que lo Parlament francés comence de debatre lo plan europèu d’estabilitat budgetària, qu’obliga los estats de l’Union de limitar lo lor deficit e, doncas, tanben la lor despensa publica.
La concentracion, convocada per qualques 60 organizacions, entre sindicats e entitats socialas, es lo primièr braç de fèrre important amb la direccion d’Hollande.
Los principals caps dels partits de l’esquèrra non socialdemocrata, e qualques sindicats, marchèron “per una Euròpa solidària, contra lo tractat de l’austeritat”.
Lo cap del Partit d’Esquèrra (Parti de Gauche, PG), Jean-Luc Mélenchon, participèt a la mobilizacion e critiquèt la feblesa dels partits de l’esquèrra tradicionala en la lucha per conservar l’estat providéncia. Segon Mélenchon, la manifestacion marca “lo començament del refús pel pòble de la politica d’austeritat” que, segon el, se consagra dins lo tractat europèu d’estabilitat.
Ça que la, lo Partit Socialista del president François Hollande s’es pas assegurada la victòria per votar lo tractat d’estabilitat. Un trentenat dels sieus deputats an previst de votar contra la ratificacion. Del lor costat, los parlamentaris ecologistas, sòcis del govèrn d’Ayrault e aliats a Hollande, votaràn tanplan contra. Pasmens, cap d’eles foguèt pas present a la protèsta, e mai se los convocants los esperavan.
Hollande s’èra engatjat pendent la campanha electolara a renegociar lo tractat, mas un còp a l’Elisi, lo president a decidit de l’adoptar.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Hollande, l'autre païs del formatatge !
Los que manifestèron a Paris son tamben los aparaires del jacobinisme francés.
E mai que contra l'austeritat es contra euròpa que manifèstan.
Nos parlan d'euròpa solidària d'euròpa dels pòbles pasmens a Barcelona lo 11 de septembre
ne'n veguère pas un d'aquela mena d'esquèrra.
Parlar uèi de defendre l'estat providéncia me sembla una idèa del segle passat.
L'estat foguèt pas providencial per totes, de regions foguèron despobladas, de lengas trepejadas...
N'i a pro d'aqueles balhaires de leiçons, Jaurès es mòrt e lo partit d'esquèrra lo sebelís un pauc mai cada jorn.
Perqué o dire pas clarament : lo partit dit "socialista" es pas socialista. L'esquèrra dita "tradicionala" es pas d'esquèrra. Lo tractat que s'engatja a signar Hollande, l'autre país del formatge, es un tractat que presenta tota politica d'esquèrra vertadièra coma illegala e interdita. Tant val dire qu'un tractat aital confisca la democraciia als pòbles d'Euròpa, ni mai, ni mens… fins a la "ultilma ola", la revolucion finala qu'o fotrà tota aquela politicalha pel sòl dins la sang e las lagremas ! Serà pas, totun, que los aviam pas prevengut, de Donostia, Barcelona, Porto, Mardrid e Atèna estant.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari