Los estatjants de Domodedovo, vila ont se plaça lo principal aeropòrt de Moscòu, an declarat l’independéncia, en establissent la “Republica Democratica Russa”, e an demandat a l’Union Europèa la reconeissença del nòu estat sobeiran, pr’amor que lo govèrn rus respècta pas los principis democratics. Planhon qu’aquel govèrn permet la construccion d’una autoestrada dins la municipalitat, segon de declaracions de l’Associacion dels Avocats Russes pels Dreches Umans a l’agéncia RIA Novosti.

Los representants del grop d’accion qu’a declarat l’independéncia an mandat una letra a l’UE, qu’assegura que Moscòu a violat los principis d’una societat democratica en tot ignorar los resultats d’un referendum de 2007, que 100% dels estatjants de Domodedovo i votèron contra la construccion d’una autoestrada dins los limits de la municipalitat.
 
L’associacion d’avocats a indicat que la nòva Republica Democratica Russa —que l’an declarada eles— deu èsser integrada dins l’UE e reconeguda per d’autres païses, amb un estatut especial coma partida de la Federacion de Russia, e amb drech a l’autodeterminacion.
 
L’avocat Ievgenii Arkhipov a declarat que los residents de Domodedovo se sentisson estrangièrs dins lo lor país, ont lo crime, l’oligarquia e la corrupcion dels foncionaris an establit lo sieu pròpri sistèma criminal.
 
Aquel magistrat assegura tanben que los estatjants son obligats de pagar d’impòstes per passar per carrièras, per l’usatge de l’aiga, per culhir de campairòls e de fragostas dins los lors bòsques; e mai an patit l’expropriacion de bens arbitràriament.
 
L’activista Marina Zlotnikova assegurèt qu’una “comunautat criminala” d’Azerbaitjan faguèt pression sus los residents que s’opausavan a l’autoestrada. Segon ela, un grop prèp de l’actual president d’Azerbaitjan, İlham Äliyev, a divèrses afars comercials a Domodedovo. Aital, l’independéncia es la sola faiçon qu’amb ela los residents se poiràn protegir, eles e los lors interèsses.