Dos ans après la mòrt de Rémi Fraisse, l’estat francés a enebit l’usatge de las granadas ofensivas de tipe F1, segon un decret publicat al Jornal Oficial de l’estat l’11 de mai passat. Fraisse èra un jove tolosan de 21 ans que foguèt tuat en octòbre de 2014 per una granada d’aquel tipe que la lancèt un gendarma dins l’encastre de la repression d’una protèsta contra la construccion d’una restanca a Sivens (Galhaqués).
 
Lo 28 d’octòbre de 2014, dos jorns après lo drama, Bernard Cazeneuve, alavetz ministre de l’Interior, aviá suspendut l’usatge d’aquelas granadas. Qualques setmanas puèi, anoncièt lor enebicion, mas calguèt esperar fins a la setmana passada per que venguèsse realitat. En decembre passat, lo defensor francés dels dreches, Jacques Toubon, demandèt al ministèri de l’Interior lo retirament d’aquelas armas.
 
 
L’enquèsta sus la mòrt de Fraisse risca de finir en non-luòc
 
Lo gendarma que tuèt Fraisse foguèt entendut en tant que testimòni assistit en març de 2016 e es pas estat perseguit per la justícia. Un rapòrt de la gendarmariá l’aviá ja blanquit en decembre de 2014, estimant qu’aviá fach los avertiments necessaris abans lançar la granada. L’enquèsta judiciària, barrada en genièr passat, risca de s’acabar sus un non-luòc, segon lo paire del jove tolosan.

 

#fraisse Le Défenseur des droits se félicite du retrait officiel des grenades offensives de type F1 de l’arsenal des forces de l’ordre

— Défenseur des droits (@Defenseurdroits) 12 de maig de 2017