Ambe la hèsta de la Catinon se hè les 10 ans de la creacion de l’escòla bilingua a Sent Lis (Gasconha Tolosana). Ara son 150 joens escoliats en òc.

A la dintrada de 2002 se draubisquèc la prumèra seccion bilingua francés – occitan deu país tolosan. Se hasquèc a Sent Lis, comuna de 8500 abitants en Gasconha tolosana, ambe un quinzenat de pichons de 4ans. Dètz ans après les pichons son 150 a profieitar d’un ensenhament occitan – francés, a paritat orària, dins las escòlas sentlisianas.
 
Podèm donc parlar d’un vertadèr succès que creèc quatre pòstes d’ensenhants en occitan: un en mairala, dus en elementari, e un pòste au collègi en matematicas en occitan. Cau notar qu’es la sola seccion bilingua deu public a hèr las matematicas en occitan au collègi.
 
De notar que le succès de la seccion s’explica pr’amor d’una volentat politica. En ganhant las eleccions municipalas en 2001, l’occitanista Patric Lasseube, butèc de contunh ende la creacion d’un ensenhament corrècte de l’occitan. Aquò es encara un exemple clar que l’accion politica paga mès qu’una unica accion culturala on l’occitanisme a tendéncia a s’embarrar.
 
Mès, ara l’ora es la hèsta endeus 150 escolans d’occitan sentlisians. Una iniciaciacion a las danças occitanas serà hèita per J.F. Capon a las escòlas de Sent Lis, le divendres 5 d’octòbre.
 
Las celebracions vertadèras començaràn a 10h30 le dissabte 6 d’octòbre ambe l’inauguracion de la carrèra Carles Molin a Tolosa, ambe la preséncia deu maire mondin P. Cohen.
 
Le grand moment serà a Sent Lis, a l’espaci Graveta a partir de 18h, ambe les cants occitans deus pichons peu 10n aniversari de la seccion bilingua. La Catinon e le Jacotin balharàn bonbons aus dròlles ende’us remerciar e les grands auràn la tradicionala còca de cebas de Minjacebas ambe le còp de vin doç (es gratís!). Tot aquò serà seguit d’un repaish tolosan a 6 euros e d’una balòcha gratuita de Manu Isopet a partir de 19h. L’ambient es garantit!
 
L’endoman, le dimenge 7 d’octòbre, a 11h, se harà una granda mèssa occitana a la glèisa de Sent Lis ambe l’abat Passerat e la corala occitana de Legavin. Tot aquò serà seguit d’una granda taulejada gastronomica, ambe les cantaires de Sèt de Cant e le grop Que canta, a partir de 13h a la sala de la Graveta de St Lis. Le repaish còsta 24 èuros. Totas las nombrosas activitats gratuitas son possiblas gràcias au sosteng de la vila de Sent Lis.

Informacions e reservacions el tel. +33 (0)6 86 89 23 61, per e-mail, o suu sit Internet.
 
 
 
 
Nicolau Rei Bèthvéder