Lo ministèri public egipcian a acusat 48 personas suspèctas de participar e d’organizar los atacs kamikazes dels darrièrs meses dins qualques glèisas crestianas còptas d’Egipte, en tuant mai d’un setantenat de personas, çò rapòrta Geopolítica.cat.
 
Segon un comunicat que lo publiquèt diluns passat lo procuraire general egipician, Nabil Sadek, qualques unes dels suspèctes aurián un ròtle considerable dins l’autoproclamat Estat Islamic (EI). Segon l’agéncia d’informacions Mena, los 48 acusats creèron “doas cellulas de l’EI” en Egipte que participèron als tres atemptats contra los còptes.
 
 
Egipte en estat d’emergéncia
 
En abril passat, lo govèrn egipcian decretèt tres meses d'estat d'emergéncia dins lo país après lo doble atac contra de glèisas còptas a Tanta e a Alexàndria, en plen Dimenge de Rams, revendicat per l’autoproclamat Estat Islamic. Aquela orror daissèt, segon de donadas oficialas, 44 mòrts e 130 ferits.
 
Aquel doble atemptat seguissiá l’atac que lo patiguèt una catedrala còpta del Caire l’11 de decembre, ont moriguèron una vintena de personas.


Qui son los còptes
 
Los còptes son lo segond grop religiós mai nombrós d’Egipte, solament après los musulmans. Las estimacions mai bassas los situan al 5% de la populacion egipciana, del temps que las mai nautas dison que son mai del 20%. Minority Rights Group calcula qu’a l’ora d’ara serián entre 5 e 7 milions. I a tanben una comunautat còpta istoricament enrasigada al país vesin de Sodan, e ara tanben en Libia, fruch de l’emigracion. Son de crestians, que la majoritat son fidèls a la Glèisa Còpta d’Egipte. S’i tròban tanben de minoritats catolicas e protestantas.
 
Lo mot còpte ven del mot arabi qubt que ven del grèc Aigyptios, es a dire, “egipian”. La tradicion còpta ditz que la preséncia crestiana dins lo país es del sègle Ir après lo Crist, amb l’arribada de Marc l’Evangelista a las còstas mediterranèas. Es a dire, sièis sègles abans l’islam. En mai d’aquò, la lenga còpta —qu’a l’ora d’ara solament s’emplega d’un biais liturgic— es una evolucion modèrna de l’ancian egipcian, de la lenga dels faraons. Per aquelas doas rasons, los còptes insistisson sovent qu’eles son estats egipcians abans tota autra comunautat.
 
Los emplecs tradicionals dels còptes son divèrses. Dins l’elèit còpte se tròban de petits proprietaris e de gents d’afars. I son tanben los membres mai destacats de la glèisa còpta. Las classas popularas còptas son formadas de païsans, d’obrièrs e d’elevaires —en i comprenent los qu’an de pòrcs, que s’utilizan tanben en lo reciclatge d’escobilhas—.
 
 
Violéncias intensificadas dempuèi 1972
 
L’istòria dels còptes pendent las darrièras 50 annadas en Egipte es estada convulsada. Pels còptes, 1972 es un an simbolic: la cremada de la glèisa de Khanka aquel an marca lo començament d’una seguida de violéncias qu’arriban fins al jorn d’uèi. Dempuèi se son passats divèrses chaples: 18 còptes assassinats en 1981 a Zawya Al Hamra, 21 de mai lo primièr jorn de 2000 a Al Kosheh, e d’autres 21 a la sortida d’una glèisa d’Alexàndria en 2010. Aqueles son los masèls mai sagnoses, mas n’i a agut d’autres, al delà de la cremada de glèisas, de monastèris e d’ostals
 
Aquela situacion d’inseguretat e las malaisidas condicions economicopoliticas d’Egipte an provocat una emigracion continua de populacion còpta cap a l’estrange, mai que mai en Euròpa e America. Als Estats Units n’i a almens 300 000 e en Canadà entre 50 000 e 350 000. De desenats de milièrs d’eles vivon dins divèrses païses europèus coma lo Reialme Unit, Itàlia e los païses escandinaus.