Montpelhièr seguís sul meteis ritme

Dins la correguda al títol Montpelhièr e París, tots dos vencedors aquela dimenjada, daissan pas l'adversari alenar. Los òmis de Rene Girard, malgrat una partida sens complèxe de la polida còla de Sochaux, s'impausèron dissabte de ser, en obligar los parisencs a ganhar lo classic per se pas far distanciar. Montpelhièr produsiguèt una partida de bona qualitat. Un gòl en cada tempsada (Belhanda, 4a minuta, e Camara a la 55a), e fòrça concentracion per resistir a la pression de la còla de Sochaux de las detz darrièras minutas: Montpelhièr provèt a son public qu'a las espatlas per tenir aquela primièra plaça. Se desplaçaràn a Marselha, dimècres, per la partida decalada de la 30a jornada.

París se daissa pas distanciar

La pression èra suls parisencs, arser, forçats de ganhar per demorar dins la corsa. De l'autre bòrd, la còla marselhesa traversa una passa catastrofica, e capitèt pas de far milhor que las setmanas passadas o qu'a Munic. Menez dubriva la marca lèu-lèu pel PSG, abans de recular un pauc e de daissar l'OM menar lo jòc. Mas en van: la dominacion dels marselheses demorèt esterila, fins a l'egalizacion d'Ayew (centre d'Azpilicueta, encara). Lo rampèl serviguèt pas gaire, pasmens: doas minutas après, Alex Costa balhèt la victòria als parisencs. La crisi es plan installada, a l'OM.

Los espers fondan per Tolosa

Tot va mal a Tolosa, aprèp la desfacha a Lilla, la setmana passada. Aquel novel desplaçament dins lo nòrd s'acaba amb lo mateis bilanç, dos gòls encaissats e cap de punt d'ajustar al comptador. Tabanou, expulsat abans la pausa, daissèt sons companhs a dètz, e los tolosencs poguèron pas crear pro de situacions claras per pretendre anar milhor. La Champions League s'eslonha, encara, e se caldrà avisar de perdre pas lo parat de se qualificar per l'Euròpa League.

Niça bufa un pauc

Niça jugava una partida decisiva pel manten, fàcia als bretons de Lorient. Mai d'aquò, las autras resultas daissavan pas la causida als niçards. Per seguir lo ritme impausat per Valencianas, Caen o Brest, la victòria èra necessària. Los roges e negres manquèron pas lo parat de s'eslonhar un pauc de la zòna roja. Amb dos gòls de Mounier e Civelli, los niçards prenguèron lo larg sus Lorient. Mas la situacion demòra complicada: ara son sèt las còlas concernidas per la lucha pel manten, desseparadas per quatre punts.

Bordèu ja en vacanças?

Bordèu, com las setmanas precedentas, seguís dins la mateissa dralha. Pas de jòc, pas de motivacion, pas de volontat ni colectiva ni individuala. Tremoulinas, absent per una dolor a la camba esquèrra, daissèt sa plaça a Chalmé, titularizat per primièr còp en 2012. Sens gaire de reussida. La còla bordalesa s'inclina a Caen, 18n del campionat, sens aver jugat ni ensajat res. L'esper de l'Euròpa League per sauvar una sason sens estrambòrd, envolat tanben. Lo public girondin espera las vacanças amb impaciéncia.

Las resultas:

Montpelhièr – Sochaux 2-1 ; Brest – Lilla 3-1 ; Valencianas – Tolosa 2-0 ; Aiacciu – St Esteve 1-1 ; Evian – Rennes 1-3 ; Dijon – Nancí 0-2 ; Lion – Aussèrra 2-1 ; Caen – Bordèu 1-0 ; Niça – Lorient 2-0 ; París – Marselha 2-1.

Classificacion:

Clarmont manca lo hold-up

Mónegue : la fin del malpantais?

Per Mónegue al contrari, la situacion s'esclarís. Una novela victòria (la sieisena en uech encontres), fàcia a Nantes, los rassegura enfin. Son onzens e pòdon bufar un pauc, per primièr còp en la sason. Marco Simone e los sieus òmes, se son pas encara sauvats, an capitat pasmens de bastir una còla volontària e eficaça. Los aficionats, o gausan pas dire encara mas son ja a agachar en naut del classament: dètz punts los desseparan encara del primièrs, mas amb lo ritme dels monegascs aprèp dos meses, tot pòt èsser possible.

Clarmont manca lo hold-up

En inferioritat numerica dempuèi la pausa e l'expulsion de Fomen, los auvernhats del Clarmont Foot passèron a ras d'una victòria suspresa dins lor opausicion amb Reims, segond del campionat. Cinc minutas abans la fin de l'encontre, los clarmonteses èran davant, encara, parats a l'espleit e a panar tres punts. Pr'amor arser, una victòria occitana a l'estadi Auguste Delaune seriá estada un polit panatòri. Lo realisme dels auvernhats manquèt pagar, ièr; la còla de Der Zakarian torna amb lo ponch del rampèl, e demòra en pausicion per jugar la pujada.

Las resultas:

Bastia – Guingamp 3-1 ; Troyes – le Havre 1-0 ; Laval – Sedan 5-1 ; Arla-Avinhon – Tors 2-2 ; Angers – Châteauroux 2-0 ; Boulogne – Istre 1-1 ; Lens – Le Mans 1-3 ; Amiens – Metz 1-1 ; Mónegue – Nantes 2-1; Reims – Clarmont 2-2