Dempuèi lo 1r d’octòbre passat, Television de Catalonha a eliminat lo sieu canal cultural (Canal 33) e n’a refondut la programacion amb la del canal infantil e juvenil (Supèr 3 / 3XL). A agrandit, per contra, la cobertura territoriala del canal esportiu (Espòrt 3). Fa d’ans, Catalonha Ràdio aviá ja eliminat la siá frequéncia culturala (Catalonha Cultura).

“Mai d’espòrt e mens cultura”, sembla qu’es lo messatge que Television de Catalonha a lançat a l’audiéncia en eliminar —sens avertir, en fasent cap de publicitat ni cap de discussion publica— lo sieu canal cultural, Canal 33, qu’aviá recebut darrièrament d’elògis per la siá excellenta programacion. A agrandit, per contra, la cobertura territoriala del senhal del canal esportiu, Espòrt 3. Una brèva nòva sul web de la Corporacion Catalana de Ràdio e Television anóncia tot simplament “de cambiaments de frequéncias e una reordinacion de contenguts”.
 
Aquela accion contra los contenguts culturals a la television e contra la preséncia del catalan dins los mèdias s’apond a la que faguèt fa qualques ans Catalonha Ràdio quand eliminèt la frequéncia culturala, Catalonha Cultura, comparabla a France Culture, e quand la remplacèt per una radioformula, iCat FM, amb de musica e d’ofèrtas de consume de produches culturals.
 
Redusir lo nombre de canals de Television de Catalonha (que dins los darrièrs meses son passats de sèt a cinc) èra una de las exigéncias del Partit Popular de Catalonha per manténer lo sieu sosten al govèrn d’Artur Mas. Del temps que se pòt veire un vintenat de canals en espanhòl dins lo Principat de Catalonha, los fins ara sèt canals de Television de Catalonha (amb una programacion majoritàriament en catalan e occitan) èran la ressorsa flaca per manténer vivas las lengas pròprias dins los mèdias de massas. Per aquò, èran un enemic de batre pel PP, dins la siá campanha per espanholizar Catalonha.
 
 
 
 
Josep M. Milla