L’alpinista catalan Kilian Jornet a pojat dos còps la cima de Chomolangma, la montanha pus nauta del Mond, dins la meteissa setmana e sens far servir d’oxigèn artificial.
 
La primièra pojada la faguèt dins la nuèch del 21 al 22 de mai, en un temps recòrd de 26 oras per la via Nòrd, en Tibet. Alavetz Jornet conquistèt mai de 3800 mètres de desnivelat positiu, dont 30 quilomètres de morènas e 2300 mètres d’ascension sus una penda de mai de 50 grases. En aquela escasença Le Monde parlava de “l’ultraterrèstre Kilian Jornet”, e L’Équipe, d’un costat raportava l’eveniment, e de l’autre publicava una fòto-reportatge de “l’immensa carrièra” de l’esportiu.
 
E dissabte i tornèt. Sièis jorns après Jornet tornèt pojar Chomolangma pel costat nòrd en 17 oras. Se lo primièr còp partiguèt del monastèri de Rongbuk, a 5100 mètres d’altitud, al segond còp es partit del camp de basa avançat qu’es a 6500 mètres.
 
“De far la cima dos còps en una sason e sens oxigèn dobrís de nòvas possibilitats”, çò diguèt Jornet en explicar sas sensacions après sa valentiá, e en ajustar que fasiá fòrça vent, çò que l’empediguèt d’anar mai lèu.
 

 
 
Aquò es la darrièra partida del projècte personal de Jornet nomenat Summits of My Life (cimas de ma vida), amb lo qual l’esportiu a ensajat d’establir de recòrds d’ascension de las principalas montanhas de la planeta. Comencèt al Mont Blanc en 2012 e dempuèi alara escalèt Cervin (tanben en Arpitània), Denali en Alaska e Aconcagua, la montanha pus nauta d’America. Ensagèt Chomolangma en setembre passat, mas o deguèt ajornar a causa de las marridas condicions metereologicas.
 
 
Dimenjada d’aur per l’alpinisme catalan
 
Mas la dimenjada passada, Jornet èra pas lo sol catalan que se trobava sus Chomolangma. L’alpinista Ferran Latorre conquistèt tanben la montanha pus nauta del Mond en complir lo projècte CAT14x8000. Atal Latorre es vengut lo primièr catalan qu’a conquistat 14 cimas de mai de 8000 mètres.
 
“Lo destin a volgut jónher dos faches importants per ieu, escalar Everest (Chomolangma), mon sòmi, e que siá la darrièra montanha dels 14 uèch-mila, en clavar un projècte esportiu e, mai que mai, un projècte de vida. Considèri qu’es estat non solament malaisit mas miraculós”, çò declarèt Latorre.
 
Amb aquela ascension, Latorre a collaborat amb lo projècte Sherpa-Everest 2017 qu’estudiarà l’exposicion a l’ipoxia dins un encastre extrèm e sos efièches cardiopulmonars, biologics e genetics. Aquel estudi pòt beneficiar a 140 milions de personas de tot lo Mond, siá perque demòran als 3000 mètres d’altitud, o siá perque an de problèmas respiratòris.