Curiosity, lo robòt de la NASA, que dempuèi qualques setmanas se passeja per la planeta Mart, contunha de mandar d’imatges que fomentan lo debat entre la comunautat scientifica.

Lo darrièr imatge enviat seriá la pròva mai fisabla que sus Mart i aviá de rius. Lo robòt a captat d’imatges de ròcas formadas amb de materials sedimentaris a partir de petits calhaus. Aqueles còdols son arredondits, çò que mòstra que patiguèron l’erosion. De mai, las ròcas fan evident lo cors dels rius.
 
En mai d’aquò, l’informacion que lo veïcul explorador Curiosity mandèt tre qu’aterrèt sus la Planeta Roja demòstra que sus la superfícia ont se tròba, i aguèt de rius d’un mètre de prefondetat pendent longtemps. Vaquí la conclusion que los scientifics i son arribats après observar aqueles còdols.
 
S’agís del primièr còp que los scientifics veson sus Mart de grava transportada per l’aiga. Aqueles calhaus son los indicadors que i aguèt un environament favorable a l’abitabilitat de la planeta.
 
Curiosity aterrèt al començament d’agost, esquipat amb una complèxa tecnologia. Dempuèi lo moment que dralhèt lo cratèr Gale de la Planeta Roja, la siá mission foguèt, principalament, d’aportar pro de pròvas als scientifics per demostrar que i aguèt d’aiga fa tres milions d’ans. Per ara es a capitar.