Actualitats
Lo PÒC vòl aprofechar la reforma del sistèma educatiu per normalizar las lengas “regionalas”
Tèxte legit
Lo Partit Occitan (PÒC) vòl aprofechar la volontat manifestada publicament pel president francés François Hollande, aquela de reformar prigondament l’escòla, per dobrir tanben lo debat sus l’educacion en lengas “regionalas”. Dins aquel sens, los occitanistas considèran qu’es una bona escasença per ensajar de modificar una politica educativa jacobina qu’a totjorn mespresat absoludament la lenga occitana e las autras lengas parladas en França en benefici del francés. L’anonci fach pel ministre de l’Educacion, Vincent Peillon, dins lo sens de dobrir un ample debat estatal per tractar “totes los aspèctes de l’educacion”, es una escasença d’aur per avançar cap a un modèl educatiu multilingüe.
Segon lo partit occitanista, la majoritat dels estudis scientifics e sociolingüistics fan evidenta l’insufisença de l’ensenhament de las lengas “regionalas” e demòstran que l’educacion en doas lengas, per exemple a travèrs del sistèma de l’immersion, non solament non afècta pas negativament los escolans, mas es quitament un element de progrès positiu. Dins aquela linha, lo PÒC met en evidéncia los trabalhs e d’estudis universitaris qu’avalizan lo bilingüisme del francés e de l’occitan dins los estudis e que demòstran qu’a d’efièches “avantatjoses” pels enfants. De fach, las escòlas bilingüas ofrisson de melhors resultats academics, quitament en lenga francesa, que las escòlas qu’impartisson las leiçons unicament en francés. De rebucada, segon aqueles estudis, l’ensenhament d’autras lengas favorís un interès e un aprendissatge màgers d’autras lengas coma l’anglés, l’alemand o l’italian.
L’objectiu del PÒC es que la dobertura de nòvas classas bilingüas siá pas una decision facultativa “de tres o quatre departaments”, mas que responda a una directiva ministeriala clara e de compliment obligatòri. Lo partit occitanista denóncia aquela “manca d’egalitat” e la considèra “inacceptabla”, e se demanda perqué qualques escolans an mai de dreches que los autres en foncion de las autoritats qu’ajan en cada moment.
Conscient que fòrça familhas defendon pas lo modèl bilingüe, lo PÒC fa una propòsta de consens: que lo ministèri ofrisca, a la liura causida dels parents, de linhas bilingüas o monolingüas dins totes los territòris occitans. Aital, qui vòlga una educacion bilingüa pels sieus enfants l’aurà, del temps que los que la voldràn unicament en francés tanplan l’auràn. Segon lo partit, aquela politica educativa “seriá una immensa passa de progrès pedagogic que permetriá als nòstres joves d’afrontar la globalizacion en tot manténer las raices dins un patrimòni viu”.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Diguèri pas que siatz nèci ., .
Doncas avètz una autra idèa... Digatz alara çò que deurià dire lo POC alara quand lo Pelhon parla de refondar l'èscòla? ?
Ieu soi d'accòrdi per l'independéncia. E vòli plan èsser ambe dos o tres " million dins las carrièras, coma los catalans. Pas vos? Mai demandi que los enfants aprenon sul pic l'occitan..
Alara sem d'accòrdi... vòli un jornal e una television nacionala occitana, que lo Baudis nos engarçèt quand arribèron las cadenas de la TNT.E ambe una plaça egala per cada grand dialecta...
#8 Ieu legissi "necitament", non "nèciament". Amistats !
Donc soi nèci. Mercés pel compliment. Donc çò qu'es possible en Corcega es pas possible en Occitània. Quina vision estrambordanta. Tant val demorar a l'ostal e anar al lièit. L'Euròpa forçarà l'Estat francés a cambiar? Es possible mas es pas segur. Ai pas causit la dralha mai facila mas cambiarai pas d'idèa.
Lo nèci de servici
Adiussiatz totas e tots,
S'agis d'una escomesa. S'agis pas de se dire necitament independentista o autonomista o federalista o encara mens 'coma o pensatz" lèca cuol de Torre Eiffel " . Lo POC fa l'escomesa que dins l'encastre europeenc , las causas viraran melhor per nosautres , COMPTE TENGUT DE L 'ESTAT MEJAN DE LAS IDEAS DINS LA POPULACION OCCITANIA , que son pas tarriblas.....
E solide que cal aprofechar de la question pausada per lo ministre Pelhon , per pausar lo problèma de la capitada dels enfants dins l'escòla. Ara aquò's pas qu'un fracatge, puèi que mantunes sabon pas legir, escriure la lenga de la Molièra e encara mens la de la Ginestas , e quitament comptar , puèi que fin finala e de tot biais totes se van s'acarrar a un cautmatge massiu e creissent... Non? E que jamai tornarà coma dabant ... Lo plen emplèc.
L'estrategia del POC , qual pòt èsser a l'época d'ara?
Cal pas esperar de l'Estat francés qu'accepte l'ensenhament bilingüe obligatòri dins las regions occitanas o de las autras nacions de França. La pausicion del POC pòt ansin èstre considerada coma realista. Mas lo POC es pas un partit autonomista? Me sembla que dins una autonomia de las regions occitanas l'executiu deuriáaver la possibilitat d'impausar (ambe possibilitat de derogacions coma en Corcega) l'ensenhament bilingüe. Aquela pausicion del POC es tròp minimalista e la cal criticar evidentament.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari