Fa qualques jorns, la municipalitat de La Vaur ven de metre en plaça de panèls d’intrada d’aglomeracion portant la version occitana del nom de la vila. L’associacion ciutadana Lo Clusèl se regaudís d’aquela presa en compte de l’identitat occitana de la comuna e felicita per aquela accion la municipalitat e son cònsol, Sénher Bernat Caraguion. Per dignitat retrobar, totas las comunas del país, La Vaur coma las autras, an tot a ganhar a multiplicar los signes vesedors de son identitat occitana. Lo patrimòni lingüistic d’una ciutat tan cargada dins l’istòria d’Occitània coma l’es La Vaur, s’ameritava d’èsser, enfin, pres en compte.
 
Es un bon començament e tornam dire nòstra reconeissença de ciutadans occitans a la municipalitat vauresa. Mas aqueste patrimòni lingüistic deu èsser desvolopat al delà dels panèls d’aglomeracion. Ara, son los noms de las carrièras que devon tanben passar naturalament a l’occitan. Ja, fa vint ans d’aquò, lo Cercle occitan de la vila o demandava, de bada. Es pr’aquò una demanda legitima de la populacion que se deu d’èsser concretisada al pus lèu. L’estudi scientific necessari a una tala mesa en òbra es ja estat fach pel Cercle occitan. Es a la disposicion de la comuna. A n’ela de se’n sasir per fin de tornar a La Vaur e a sos estatjants lor fiertat d’Occitans.
 



Lo Clusèl