Lo cap de la societat Vinci empòcha tornarmai dos milions d’èuros segon Reporterre. Lo quotidian francofòn de l’ecologia rapòrta que Xavier Huillard, president director general de la societat de construccion, mai que mai d’autoestradas e aeropòrts, s’es enriquit d’un biais escandalós.  Segon aquelas informacions, otra son salari de 2,5 milions d’èuros per an, Huillard a encaissat dos milions suplementaris en vendent d’opcions sus accions, valent a dire las accions recebudas gratuitament qu’el pòt vendre a son grat. Aquelas chifras son conegudas gràcias al fach que, legalament, los dirigents de las grandas entrepresas devon declarar lors operacions sus las accions de lors pròprias entrepresas a l’Autoritat dels Mercats Financièrs (AFM), que publica sus son sit totas las informacions financièras.
 
Dins son informacion, Reporterre recòrda que Vinci es la societat que vòl construir lo polemic aeropòrt a Kernitron-al-Lann (Bretanha), lo grand contornament autoestradièr d’Estrasborg (Alsàcia), l’estrada del litoral “del prètz extravagant” a l’illa de la Reünion, e a realizat la desastrosa linha de granda velocitat entre Tors e Bordèu, “demest d’autres projèctes inutils”.