Qualques païses arabis e d’autres de tradicion musulmana an romput lors relacions amb Qatar, çò publicàvem dimars passat, a causa de son sosten al jihadisme. Mas es de verai per aquela rason? La trencadura de relacions amb Qatar, que pertòca tot contacte amb aquel emirat, l’an facha l’Arabia Saudita, los Emirats Arabis Units (EAU), Bahrayn, Egipte,  Iemèn, Libia e las Maldivas. Qualques unes d’aqueles païses, almens totas las monarquias del Golf Persic, sostenon de qualque biais lo terrorisme jihadista.

L’emirat de Qatar es sus una peninsula del Golf Persic, e justament es lo mot peninsula, qu’en arabi se ditz “Al Jazira”, qu’auriá provocat aquela crisi. Al Jazira es la cadena de d’informacions televisadas pus poderosa. Creada en 1996 per la familha Al Thani de Qatar, es venguda una television de referéncia dins tot lo Mond amb una linha jornalistica que plai pas brica a la familha Al Saud, que comanda l’Arabia Saudita.
 
Al Jazira a raportat las divèrsas revòltas de Tunis e Egipte a la fin de 2010. La cadena qatarita, e la majoritat dels mèdias del Mond, se mostrèron favorables al pòble e contraris als autocratas. Foguèt reversat Mubarak, lo grand aliat de l’Arabia Saudita, e los Fraires Musulmans arribavan al poder d’un biais democratic. L’Arabia Saudita èra indignada mentre que Qatar los sosteniá.
 
En març de 2011, Al Jazira donava la paraula a la revòlta shiita de Bahrayn, la zòna petrolièra pus importanta de la region. Aquela revòlta cercava de cabussar la monarquia absoludista dels Khalifas, parents e aliats dels Sauds. L’Arabia Saudita mandèt 1000 soldats en Bahrayn, qu’amb los 500 dels Emirats Arabis Units estofèron la revòlta.
 
 
Israèl e los Estats Units contra Iran
 
E mai se Qatar èra dins l’oposicion envèrs las monarquias sauditas, lo país èra dins la dralha dels Estats Units de Barack Obama, que cercava una nòva politica amb Iran que l’atenguèt amb l’acòrdi dels 5+1 per restrénher lo programa nuclear d’aquel país.
 
Mas l’Israèl de Benjamin Netanyahu s’es totjorn manifestat contra aquel pache amb Iran, e lo nòu president dels Estats Units, Donald Trump, es dins la meteissa dralha. Justament, lo primèr país que lo vistalhèt Trump coma president estatsunidenc es l’Arabia Saudita, amb una venda miliardària d’armas e un acòrdi contra l’enemic comun, Iran, que parteja de sits de gas amb Qatar.
 
Après sa vesita en Arabia Saudita, Trump vistalhèt Israèl. L’Air Force One es lo primièr avion de l’istòria que volèt de Riyad a Tel Aviv. Aquí Trump mostrèt sa volontat de tornar a la situacion anteriora, en manifestant la rompedura de l’acòrdi amb Iran, e de refortir la posicion d’Israèl.
 
De soslinhar que Trump es lo primièr president d’un govèrn que vesitèt lo Mur de las Lamentacions, a l’èst de Jerusalèm, un territòri qu’Israèl ocupa illegalament dempuèi cinquanta ans.