Qualques esportius de l’esquipa d’andbòl de Montpelhièr, amb entre eles lo campion olimpic Nikola Karabatić qu’es considerat coma lo melhor jogaire del mond, foguèron arrestats dimenge passat a París, en relacion amb l’enquèsta dobèrta per aver presumidament escomés sus la lor desfacha, en perdent de partidas e en ganhant l’argent del jòc.

Las arrestacions se debanèron paucas minutas après que Montpelhièr, ganhant de nòu dels dètz darrièrs campionats de França, perdèsse contra lo París-Saint-Germain (PSG) per 38 a 24 en una partida de la Liga francesa.
 
Al delà de Karabatić, arrestèron lo sieu fraire Luka, tanben jogaire de Montpelhièr, e Samuel Hanrubia e Mladen Bojinović, transferits al PSG al començament d’aquesta sason. En mai d’aquò, tanplan arrestèron lo fisioterapèuta que trabalha per la seleccion. En tot, dètz personas foguèron arrestadas.
 
D’agents de la polícia esperèron los jogaires a la fin de la partida, los arrestèron e los menèron al comissariat de Nanterre, près de París, per los enquestar. Al delà, tanben metràn en examen las esposas de qualques unes dels esportius.
 
La polícia suspècta qu’almens uèch jogaires del club, e las lors esposas e nòvias amb de membres de l’esquipa tecnica, joguèron de gròssas quantitats de sòus en una partida de la fin de la sason passada que lor auriá portat qualques 200 000 èuros.