L’organisme es obligat d’aplicar una senténcia del Tribunal d’Arbitratge de l’Espòrt. Las federacions europèas auràn de votar sus l’intrada definitiva dels gibartarencs lo mes de mai que ven. Madrid anóncia una batalha juridica per empedir l’intrada de Gibartar dins l’UÈFA.

Lo govèrn de Gibartar s’es declarat “encantat” de l’anonci de l’intrada provisòria de la Federacion de Fotbòl de Gibartar a l’UÈFA, l’organisme que govèrna aquel espòrt en Euròpa. L’admission —que se deurà votar definitivament dins lo congrès ordinari, que l’UÈFA celebrarà a Londres lo 24 de mai de l’an que ven— se faguèt efectiva diluns passat, lo 1r d’octòbre, après que l’UÈFA apliquèsse una senténcia del Tribunal d’Arbitratge de l’Espòrt (TAS) favorabla a la demanda de Gibartar.
 
De fonts diplomaticas espanhòlas, citadas per l’agéncia EFE, afirmavan diluns meteis que Madrid luchariá “amb totes los mejans juridics possibles” per evitar l’intrada definitiva de Gibartar dins l’UÈFA. Non solament aquò, mas tanben qu’Espanha a avertit a l’avança que retirarà las siás seleccions e los clubs de las competicions ont participen de representants gibartarencs.
 
Lo govèrn de Gibartar considèra que lo govèrn espanhòl ensaja de mesclar espòrt e politica sus aquela question. Son de faches, çò ditz lo govèrn de Gibartar, que “totas las autras nacions importantas veiràn e voldràn evitar”.
 
L’admission de Gibartar a l’UÈFA se votèt pel primièr còp en 2007. En aquela escasença, 45 federacions se mostrèron contra, e solament tres votèron en favor: Anglatèrra, Galas e Escòcia.
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.