L’Universitat Occitana de La Guépia (Segalar Roergàs) se debanarà del 10 al 15 de julhèt. Prepausa un luòc e un temps d’ensenhament, d’animacion, d’estudi, mas es tanben, una endevenença mannada de rescontres (e de convèrsas) improbables endacòm mai: los escolans dels corses pòdon parlar amb d’occitanofòns “naturals” del vesinat coma amb d’escrivans, d’intellectuals e d’artistas de renom, los vièlhs savis als joves lançats, la cultura sabenta rescontra la cultura populara, los estrangièrs rescontran los del país sus de questions d’istòria e de patrimòni. Tot aquò dins un ambient al còp estudiós e pausadís, amb los pès chimpats dins l’aiga de Viaur e d’Avairon, e amb la consciéncia d’aprestar, en primadièrs, l’avenir del país.
 
Lo programa prepausa cada jorn de corses de lenga sus quatre nivèls e d’obradors de traduccion, de cant e de danças. Tanben de conferéncias e d’aperitius musicals amb Xavier Vidal, Ministèri del Riddim, Les Boudoumen, Carabal Trio. En mai d’aquò se projectarà los filmes Le Chant des fous de George Luneau e Camin de lenga de Sylvain Roux.
 
Lo programa prepausa tanben una passejada toponimica, un concors d’istòrias en occitan amb 500 èuros en prèmis e de concèrts e de balètis amb los Pompièrs de la Guépia, Manu Théron e lo Balèti dau Papet e Poupa Greg.
 
Las novetats d’ongan son los estagis de cant, dansa e tamborin per d’enfants e adolescents, l’estagi de cant pels adultes, e lo talhièr de cant matinal guidat per Manu Théron.
 
E de soslinhar las projeccions de dessenhs animats pels enfants, e filmes e documentaris pels joves, de libres pels mainatges.
 
Mentre que se tendrà l’eveniment, la mediatèca de La Guépica aculhirà l’exposicion “Los amics de Joan de l’Ors”.