Lo nòu primièr ministre georgian vòl tornar dobrir lo transit a travèrs d’Abcazia cap a Russia, e mai vòl melhorar las relacions comercialas. Lo ganhant de las eleccions vòl “fargar de bonas relacions” tant amb l’OTAN coma amb lo Cremlin. I a de lagui entre los abcazes e los ossèts del sud per un possible melhorament de las relacions entre Tbilissi e Moscòu.

Solament lo temps dirà se la victòria de Bidzina Ivanishvili e de la siá coalicion, lo Sòmi Georgian, cambiarà substancialament las relacions entre Georgia, Abcazia, l’Ossetia del Sud e Russia. Mas çò segur es que lo magnat georgian, que venquèt dimars passat Mikheil Saakashvili a las eleccions legislativas de Georgia, a emplegat pendent la campanha un ton de conciliacion amb Abcazia e l’Ossetia del Sud, las doas republicas que se proclamèron independentas al començament dels ans 1990.
 
Ivanishvili —del meteis biais que Saakashvili— vòl reïntegrar Abcazia e l’Ossetia del Sud a Georgia. Ça que la, lo que serà lèu lo primièr ministre georgian declarèt o voler far d’un biais mai conciliaire que lo sieu predecessor, qu’ensagèt de las recuperar per la fòrça l’estiu de 2008, mas sens succès a causa de l’intervencion russa.
 
Fa doas setmanas, l’agéncia russa Interfax citava las declaracions del cap del Sòmi Georgian pendent un rescontre. Ivanishvili afirmèt que lo nòu govèrn ensajariá de “rebastir la fisança amb los fraires abcazes e los ossèts” per mejan d’iniciativas coma la redobertura del transit estradièr e ferroviari a travèrs d’Abcazia cap a Russia, la permission per las entrepresas abcazas de far de comèrci vèrs Georgia e, tanben, la declaracion del districte de Gali (lo mai meridional d’Abcazia, e frontalièr amb Georgia) coma “territòri de patz”.
 
 
Un president per Georgia amb de connexions russas
 
De mèdias especializats sus l’airal caucasenc, coma RFE/RL, an comentat la diferéncia entre Saakashvili, decididament pròoccidental e partisan de l’intrada de Georgia dins l’OTAN, e Ivanishvili, un òme qu’amassèt la siá fortuna en Russia pendent los ans 1990, qu’arribèt de n’aquerir la nacionalitat —e qu’i a renonciat— e que manten de bonas relacions amb l’òme fòrt del Cremlin, Vladimir Putin. Dimars passat, Ivanishvili declarava qu’el vòl “fargar de bonas relacions” tant amb l’OTAN coma amb Russia”. Es pas lo primièr cap de l’ancian espaci sovietic qu’ensaja de manténer aqueles equilibris: de discorses similars se son ausits e s’ausisson en Moldàvia, en Ucraïna e en Bielorussia, per exemple.
 
Ironicament, aquelas connexions russas del primièr ministre novèl son pas gaire tranquillizantas en Abcazia e en Ossetia del Sud. Lo jornal numeric Kavkazskii Uzel consagrava dimars un ample reportatge a la question, en lo qual divèrses caps abcazes e sud-ossèts exprimissián lor paur qu’un melhorament de las relacions entre Russia e Georgia anèsse contra lors doas pichonas republicas. L’argument es que s’Ivanishvili fa tornar Georgia dins la cleda del Cremlin, Putin poiriá pèrdre l’interès per Abcazia e l’Ossetia del Sud, las poiriá desprotegir militarament, e quitament las poiriá emplegar coma moneda.
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.