Eth Govèrn dera Generalitat de Catalonha, qu'a decidit en conselh de govèrn celebrat aguest dimars 10 d’abriu, de concedir era Crotz de Sant Jòrdi, ua des sues arreconeishences mès granes, ath curat aranés Mn. Josep Amiell Solè, après qu'eth Plen deth Conselh Generau d'Aran decidisse per unanimitat de demanar aguest guerdon eth 3 de noveme passat. Ath delà, totes es institucions dera Val d'Aran e era societat civiu an balhat eth sòn sosten ara demana.
Eth sindic d’Aran, Carlos Barrera, a dit que comprenia “qu'auie arribat eth moment que li siguesse arreconeishut eth trabalh, eth compromís e era defensa dera identitat deth nòste país, que damb grana abiletat, dedicacion e fermetat a amiat a tèrme Mn. Jusèp Amiell pendent tota era sua vida, coma un defensor e patriòta dera identitat aranesa”.
Mn. Jusèp Amiell qu'ei coautor deth Petit Missau Aranés editat en 1978, que permetec d'oficiar es misses en occitan tre aqueth moment. Eth 17 de gèr de 1979 que balhèc ara capèla deth Pater Noster de Jerusalèm era pregària deth Pair Nòste en aranés, en tot ahíger era lengua occitana a fòrça d'autes versions dera pregària. En Març de 2010 que publiquèc eth Nau Testament arrevirat ar aranés, e en 2011 es Psalmes tostemp en lengua nòsta.
Ath delà, eth curat aranés qu'ei estat secretari dera Fondacion deth Musèu Etnologic dera Val d’Aran, membre deth Patronat deth musèu, e cofundador dera revista “Tèrra Aranesa”. Qu'a amiat a tèrme quauqui estudis restacadi damb era Val d’Aran, eth sòn patrimòni e era sua identitat.
Era Crotz de Sant Jòrdi, li serà autrejada peth president dera Generalitat de Catalonha, Artur Mas, eth pròplèu dia 20 d’abriu, en acte que se celebrarà en Salon Sant Jòrdi deth Palai dera Generalitat de Catalonha. Ara ceremònia que i assistirà eth sindic d’Aran Carlos Barrera.
Mn. Jusèp Amiell qu'a arrecebut, entre d’autes arreconeishences, era Medalha d’Aur d’Aran que li siguec autrejada en 2010 e eth prèmi Lengua Viua en 2004.
Conselh Generau d'Aran / Ferriòl Macip
#1 Esperi que se, cresi que lo President de Catalonha li caldriá far lo discors, o una part del discors en aranés (occitan de la Val d'Aran), en prenent en compte que l'occitan es oficial dins la Val d'Aran e lo tresen idiòma oficial a Catalonha.
Ua bona notícia. Non i a cap dobte. Mès quauquarrés me sap díder se eth President de Catalonha parlarà o prononciarà bèra part deth discors en aranés coma reconeishença cap ara cultura occitana? Gràcies!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari