Urkullu vòl cercar una “formula d’assemblatge dins un domeni europèu de sobeiranetats partejadas”. EH Bildu convòca un “acte nacional per l’independéncia” lo 13 d’octòbre que visualize la volontat basca d’èsser “un estat liure en Euròpa”.

Lo president del Partit Nacionalista Basco (PNB) e candidat d’aquela formacion a la presidéncia de la comunautat autonòma del Bascoat, Iñigo Urkullu, a reclamat dimenge passat qu’aquel territòri basco pòsca definir lo sieu futur “sens de subordinacions impausadas” e “sens mai de ligams que la liura decision dels ciutadans bascos”. Segon Urkullu, lo Bascoat o deu far per mejan d’un “pache” que siá la “formula d’assemblatge a un domeni europèu de sobeiranetats partejadas”.
 
Lo presidenciable del PNB faguèt aquelas explicacions pendent la celebracion de l’Alderdi Eguna (lo Jorn del Partit), e metèt en evidéncia que lo sieu partit es per assumir mai de poders per lo Bascoat. En cap de moment diguèt pas lo mot “independéncia” e tanpauc parlet pas de cap de sòrta de consulta o de referendum.
 
 
Bildu es a organizar un “acte nacional per l’independéncia”
 
Mentretant, la coalicion independentista d’esquèrra EH Bildu, que Laura Mintegi la dirigís, organiza lo 13 d’octòbre que ven un grand “acte nacional per l’independéncia” a Barakaldo, un acte que cèrca de far veire, d’un biais clar, que los bascos vòlon “èsser un estat liure en Euròpa”, un estat que s’aluènhe del “dictat dels mercats e de las finanças” e qu’insistisca pas “dins las meteissas politicas neoliberalas qu’ofrisson pas cap de sortida”.
 
Las enquèstas pus recentas plaçan lo PNB amb fòrça possibilitats de venir lo partit tenent mai de sètis dins lo parlament venent del Bascoat, qu’i obtendriá entre 23 e 25 deputats. EH Bildu seriá en segonda posicion, amb 21 o 22 sètis. Lo Partit Socialista tombariá a la tresena posicion, amb 17 deputats, e lo PP seriá la quatrena fòrça, amb 12 o 13 sètis.
 
 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.