Pr’amor de las aulors e de las moscas qu’acompanhèvan las soas vacas, un agricultor de Sent Vincenç de la Montjòia (Labrit) es estat condemnat diluns per la cort d’apèl d’Agen a una multa de 6000 èuros, e a pagar 2500 èuros au planhent.

Aqueth neuridor, tanben salariat dens una enterpresa deu parçan, s’aucupa d’un ligòt d’un shishantenat de bèstias, sus un terrenh de 18 ectars. Au miei deus camps, un ostau es estat crompat en 2006, per un navèth vesin. Pr’amor de l’aulor de las vacas, e de las moscas, aqueth vesin portèt lo clam. Ganhèt en apèl, dens una istòria que pòt har sonrider mès que chepica hòrt lo monde agricòla.
 
Aquera victòria juridica (çò juridic coincidís pas tostemps dab çò rasonable) marca un precedent dens aquera mena d’ahars. La FDSEA 47 (Sendicat d’espleitants agricòlas) cranh, de hèit, qu’aquera traca de clams se generalizi, e que la justícia se placi d’ara enlà deu costat deus planhents, en “empachar los agricultors de tribalhar a mensh de 100 mètres d’una abitacion”.
 
La FDSEA encontrèt lo conse de la comuna, Pierre Dufust, per li demandar de tirar l’arrestat municipau que precisèva que lo passatge de las bèstias èra enebit a mensh de 100 mètres d’un ostau. Se tesican tanben pr’amor de la generalizacion d’aquera mena d’arrestats. Susquetot, la responsa judiciària a un problèma de vesinatge mandèt un signe pauc acoratjant per las professions agricòlas, ja hòrt preocupadas per la situacion economica. La question de l’amainatjament deu territòri, tant importanta en Occitània, se pausa adara a l’escala mei petita, e l’ahar de Sent Vincenç de la Montjòia mancarà pas de har aviar un debat sus la plaça deus paisans dens las comunas.
 
 
 
 
Pèir-Joan Masdiset