Dotze policièrs de la brigada anticriminalitat (BAC) del nòrd de Marselha foguèron interpelats e meses en garda dimars passat per la polícia de las polícias (IGPN), segon çò que raportava lo jornal francés Le Figaro e çò que confirmava lo jornal en linha LaProvence.com. Segon lo pòrtavotz de l’IGPN, Pascal Garibian, las interpelacions se debanèron dins lo quadre d’una comission rogatòria per “panatòris e extorsions en banda organizada, violéncias agravadas, aqueriment e transpòrt d’estupefasents”.

Los policièrs son acusats d’aver raubat d’estupefasents e d’aver extrach d’argent als dealers qu’avián interpelats. Tanben son acusats de far çò meteis amb de vendeires de tabat de contrabanda.
 
L’afar comencèt en novembre de 2011 quand la justícia remarquèt de “faches inquietants” en tanhent de foncionaris de la BAC nòrd. Aquela informacion judiciala foguèt lançada lo 22 de febrièr passat per dos jutges d’instruccion. Qualques policièrs s’èran bastit de piscinas dins lo jardin de l’ostal e s’èran comprat d’autos de luxe, mercés a l’extorsion dels dealers de la Ciutat Focèa. De micros e de camèras foguèron amagats dins los veïculs de la BAC.
 
Per ara, son plan paucas las informacions que se filtran sus aquel afar, portat per l’Inspeccion Generala de la Polícia Nacionala (IGPN), que condusís los interrogatòris dins los locals de la gendarmariá. Se sap pas encara la proporcion dels policièrs corromputs e s’aquò tòca d’autres servicis a Marselha e endacòm mai. A l’ora d’ara, son ja un vintenat los policièrs suspèctes de corrupcion.
 
L’afar pren volada, encara mai. Un sindicalista reconeis a Le Figaro que la vila es en estat de chòc e que serà malaisit de contunhar de perseguir los delinquents dins aquel contèxt.
 
Amb los escorcolhs menats dins las abitacions dels policièrs, s’es descobèrt de caissas plenas de bilhets.