Lai valaias dai Palhons son fertilai en matèria de lenga Occitana. S’i tròba de pilars de la literatura en occitan vivaroalpenc emb li fraires Pelhon de Coarasa, Bernat Fruchier de Luceram, Joan-Pau Barelli de Pelha, la familha Rigorfi (Ricolfi) de Còntes per ne’n citar que d’uns. E tanben d’artistas coma lo comic e cogordofil Cairaschi de Berra dais Alps, o de musicants emb lo grop internacionalament conoissut lo Còro de Bèrra [escrivon Corou de Berra], Renat Bermon de Bendejun, Li Paures nautres de Coarasa... 
 
 
Un terraire util per far viure la lenga
 
Lis escorans de 6a dar collègi Rabelais de L’Escarea an escrich cen qu’imaginavan en veire quarqu’un pilhant lo trin de matin, en fàcia de lor sala, en gara de L’Escarea (sus la linha Niça-Coni). 
 
 
E a doach d’istòriai ben viraias
 
Li collegians èran talament estrambordats que la mesa en comun dar trabalh de cadun doèt ua cançon collectiva pròpi creativa. Après armonizacion e recèrca de mesa en música (sus l’ària d’ua cançon festiva sonaia Retorn de nòçai), s’es fach un trabalh de memorizacion via la diccion en ritme.
 
Tot aquò emb l’ajua de l’artista gavòt palhonenc e totplen investit dins la comuna de Bendejun Renat Bermon dai gropes Lo Giro de Sandrin, Li Balandrins (que collabòra regularament ar festenal musical annal que fa la part bèla a l’occitan: Festi’Cant) e de l’amic Arno Galichet dar grop Li Stofa Garris. 
 
Emb lor experiéncia, agueriam d’ajua per lai repeticions e per enregistrar aquesta cançon. Lo projècte se faguèt ensems emb la professora de música qu’ajuèt tanben en faguent repetir. Lo tot en vista de far un CD àudio recòrdi. 
 
E mai, a l’ocasion d’ua sesilha de trabalh ar collègi, li dos artistas e li collegians participèron a ua emission dedicaia a la lenga e a la cultura occitana per lo primier anniversari de la webràdio Rabelais. Ua escorana de 4ea d’occitan faguèt la jornalista per l’ocasion. Siguèt l’ocasion de parlar de tèmas estudiats aquest an: d’istòria emb lo movement dai barbets, resistents dar temps de l’invasion militara francesa de 1792, fins a la lenga oficiala en Val d’Aran despí 1990, d’estereotipes coma l’accent o coma l’idea faussa que l’occitan seria un mesclum de francés e d’italian, de dessenhes animats e d’autri vidèos emb aqueli d’Òc Tele qu’avèm trabalhat sus.
 
Li programas son difusats sus Ràdio King e mai sus lo collectiu de webràdios de l’Acadèmia de Niça Cap Ràdio.
 
L’occitan bolega ar collègi, emb mai la sortia dar Manual d’occitan palhonenc escareasc escrich per lo professor Laurenç Revèst en collaboracion emb de persoas e memòrias de l’Escarea. Lo libret siguèt remés en mans pròprias ar cònsol de la comuna. 
 
Car esperar que suscitarà de vocacions per far de corses de lenga un pauc d’en pertot, e pas solament en lo monde associatiu. Que la populacion ne’n demanda localament e li tèxtes novèls dar Ministèri de l’Educacion son mai precises per encadrar l’ensenhament de lai lengai dichai “regionalas” coma l’occitan. Mas per lo moment, sus 181 collègis e licèus de l’acadèmia de Niça (Alps Maritimes e Var), i son que 20 professors certificats d’occitan (entre li professors fixes e li TZR, l’occitan es doncas espandit ar maxim sus 40 establimentes). I serà besonh de relèva pron lèu. A defaut de formacion dedicaia ai futurs professors d’occitan a l’universitat de Niça coma a l’ESPE (sonaia Freinet), seria totun pecat d’abandoar de bastions occitans en demanda de lenga e de cultura nòstra e que cantan mai que jamai la vida en occitan.
 
 
 
 
Las escolanas de terça
 
 
 
 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…