Ongan Jornalet festeja son cinquen anniversari amb d’eveniments per tot lo país, e tanben en Catalonha. Dins aquel sens, dissabte que ven, se tendrà una granda fèsta occitana que la còla de Jornalet avèm organizada amb la collaboracion de Viasona e del Centre Artesà Tradicionàrius.
 
La fèsta prepausa un cors d’iniciacion a l’occitan per catalanofòns, una animacion al bar pendent l’ora del sopar, e puèi un balèti occitan amb Kaj Tiel Plu e un concertàs de Goulamas’K. L’eveniment serà presentat per la deputada aranesa Mireia Boya.
 
Kaj Tiel Plu es una banda catalana que difusa a l’exterior la tradicion musicala d’Occitània e dels Païses Catalans en esperanto e en lengas originalas. An publicat tres disques amb l’ostal lauragués Vinilkosmo (Dònavila), e es un dels grops mai coneguts dins l’encastre cultural esperantista.
 
Goulamas’K es a l’ora d’ara la banda d’ska e ròck occitana de referéncia que festeja ongan son 18n anniversari. Amb sièis disques sortits, lo grop es sustot conegut per sos espectacles en dirècte. Lor son, a las aurelhas del public catalan, evòca los Obrint Pas. Ongan fan una virada per Occitània tota en presentant lor nòu disc Resisténcia, e faràn un esfòrç màger per èsser presents lo 1r de julhet a Barcelona, e mai se l’endeman devon far un concèrt a Sent Severin, en Peiregòrd (Montmaurelian).