Ven de se bandir un projècte de cooperacion internacional qu’a per tòca de revalorizar l’occitan, lo gaelic escocés e lo gaelic irlandés. Se nomena GO TO the Future (acronim de Gaelic Occitan TOgether For language Users Through United Roots and Experiences,  en occitan: “Gaelic Occitan ensems pels utilizaires de la lenga a travèrs de l’union de las raices e de las experiéncias”) e s’es lançat en seguida d’un apèl a projècte europèu Erasmus+.
 
L’objectiu deu projècte es de partejar entre mai d’un país europèu d’experiéncias sul plan educatiu e d’escambiar sus d’estrategias de salvagàrdia e de valorizacion del patrimòni cultural, amb la tòca de desvolopar e valorizar l’ensenhament de las lengas, pensar a de metòdes de sensibilizacion, crear d’aisinas d’ensenhament innovantas, etc.
 
Los partenaris del projècte son l’administracion de las illas Ebridas Exterioras escocesas, d’escòlas escocesas e irlandesas, d’associacions per la lenga, etc. Del caire occitan, los partenaris son lo Collègi Bèra Horèst de Samatan (Savés), l’Associacion per la Cultura Populara en País Gascon (ACPPG) e lo departament de Gers.
 

Una maleta pedagogica
 
An doncas facha una maleta pedagogica realizada pels partenaris a destinacion dels ensenhaires e dels escolans. La maleta es compausada de fichas tematicas que presentan los elements culturals pròpris de cada territòri. Los domenis abordats permeton una utilizacion interdisciplinària.
 
La maleta es completada d’un libre illustrat de fotografias dels espacis occitan e gaelic, enriquit d’extraches d’òbras e de reaccions dels participants al projècte.
 
Enfin, una aplicacion numerica permet de tornar trobar lo material pedagogic de la maleta.
 
Mai d’informacions sus go-to-the-future.eu.