Lo president del club de fotbòl de Montpelhièr, l’emblematic Louis Nicollin, nos quitèt ièr dijòus a sos 74 ans a Nimes. Nicollin patiguèt un malaise cardiac a la sortida d’un restaurant ont festejava son anniversari e foguèt menat devèrs un espital. “Es amb una tristesa immensa que sèm assabentats del decès de nòstre president”, çò escriguèt lo club lengadocian de fotbòl sus Twitter dins la serada.
 
Nicollin creèt en 1974 lo club de Montpelhièr la Palhada, que venguèt l’actual Montpelhièr Erau Espòrt Club (MHSC segon sa sigla en francés), una esquipa d’en primièr amatora que foguèt campiona de França en 2012.
 
L’apelavan Loulou e èra lo president pus excentric de la Liga 1 de fotbòl. Èra conegut per sas polemicas mediaticas, sas declaracions discutidas e son lengatge brut e dirècte.
 
Nicollin èra tanben un òme d’afars e president del grop Nicollin, un ensemble d’entrepresas de netejatge urban, de collècta e de retractament dels degalhs domestics e industrials.
 

C'est avec une immense tristesse que nous avons appris le décès de notre Président Louis Nicollin ce jeudi 29 juin pic.twitter.com/awamm3p8dU

— MHSC (@MontpellierHSC) 29 de juny de 2017

 
 
Los clubs de fotbòl de tot lo país an plangut lo decès de Nicollin, dont soslinham la fiulada qu’an publicada los Girondins de Bordèu, amb una fòto d’el de la cofa pintrada de las colors del drapèl francés per festejar que lo Montpelhièr èra vengut campion de França en 2012.
 

Toutes nos pensées vont à la famille Nicollin et au @MontpellierHSC. Le monde du foot perd un sacré personnage. pic.twitter.com/S9DGRV3xsn

— FCGirondins Bordeaux (@girondins) 29 de juny de 2017

 
 
Tanben, en omenatge a l’esquipa de Montpelhièr, qu’es uèi de dòl, publicam la cançon que la compausèt Mauresca a l’ocasion de la fabulosa sason del Montpelhièr, en 2011-2012.