Èra un debat en estat latent qu’esperava d’èsser activat per qualqu’un, e es lo jornal numeric breton 7Seizh que l’a començat. Dins un article entitolat “Election présidentielle de 2017: pourquoi pas un candidat autonomiste/indépendantiste?” (Eleccion presidenciala de 2017: perqué pas un candidat autonomista/independentista?), Fabien Lécuyer s’interròga sus una possibla candidatura autonomista o independentista a las eleccions presidencialas venentas per metre la question de las nacionalitats istoricas de França al centre del debat politic.
Segon lo sieu vejaire, los grands debats politics sorgisson solament pendent las eleccions presidencialas; per tant, considèra que las nacionalitats de la Republica Francesa devon èsser capablas de bastir una candidatura unitària per aténher de notorietat publica e politica, amb la tòca d’una descentralizacion reala, basada sus las identitats culturalas e pas unicament sus de critèris administratius.
Segon la lei, un candidat a la presidéncia de la Republica Francesa a de besonh de l’aprobacion o del pairinatge de 500 elegits. Segon los calculs del jornal 7Seizh, a l’ora d’ara i a qualques 114 elegits autonomistas entre los territòris metropolitans e los territòris d’otramar. Cal dire, pasmens, que fòrça elegits poirián aver una sensibilitat autonomista, e mai se son pas forçadament estacats a un partit autonomista, per çò que poirián plan sosténer una candidatura d’aquelas caracteristicas.
Presentar un candidat de consens amb lo sosten dels autonomistas e dels independentistas còrses, bretons, occitans, catalans, bascos, alsacians, savoians, flamencs, polinesians, canacs e caribencs poiriá revolucionar vertadièrament lo panorama politic francés. De rebucada, aquò permetriá de visualizar la fòrça reala de las nacions istoricas enterradas jos las fondamentas de França. E, sens cap de dobte, seriá una remontada de morala e de vam entre los partits autonomistas e los independentistas que lor permetriá de far un pas endavant al nivèl organizatiu e ideologic.
Dins lo sieu article, Lécuyer ditz, amb rason, qu’aquela candidatura es inviabla sens la participacion activa dels occitans. La lei prevei qu’aqueles 500 elegits apertengan a 30 departaments o collectivitats d’otramar. En consequéncia, sens la participacion ferma de l’occitanisme, serà impossible de presentar aquela candidatura. Cal que las fòrças occitanas i sosquen e que se n’avisen plan.
La còla de Jornalet lançam una idèa al debat: perqué pas cercar un candidat que siá pas breton, ni còrs, ni alsacian, ni basco, ni occitan, ni de cap d’autra nacionalitat istorica? E se se presentèsse un candidat nacionalament francés mas amb de prigondas conviccions democraticas per çò qu’es de las minoritats? Aquò ben seriá coma lançar una pèira dins l’estanh immobil de la politica e de la mentalitat francesa.
Ça que la, cal pas oblidar que Robèrt Lafont assagèt de presentar una candidatura d’aquel tipe a las presidencialas de 1974, mas lo Conselh Constitucional l’invalidèt.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Pas tant segur qu'aquò, que siasque una bona idèia. Aquel candidat amai arribèssa a avure las 500 signaturas cossi serà tractat pels mediàs franceses, coma un Cheminade de mai ? Dins ma vila un còp cada 5 o 6 ans avèm un tipe que se presenta jos l'etiquèta autonomista , fa entre 0, 5 e 1, 5 de las voses (e encara gracia al sosten d'EEV), e dusc'a l'eleccion venenta lo tornam pas veire. Sa candidatura en defòra de li far plaser a guèl e a sa familha ajuda pas en res los que obram cada jorn per ensenhar o far viure la lenga nòstra.
Un candidat independentista, aquò's plan. Mas uèit pòbles independentistas, aquò's l'unica solucion, davant lo noven, estabosit aqueste de constatar al final que i a plan mai qu'el e los aucelets menuts…
Pensi que aquò seriá una bona idea per la societat actuala
Pensi que òc,seria una plan bona causa d'aver un candidat que represantaria totas las nations de l'estat Frances.Mas aquò se prepara plan a l'avança e beleu qu'es lo moment,Pensi que i a un vertadier potencial,lo monde n'an pro de l'esquerra,la dreta e un discor autonomista,federalista o quitament independentista auria una escota e beleu mai...D'aquì 2017 plan de causas se van passar en Euròpa,Catalonha,Escòsia,Flandres...nos cal pas mancar lo tren de l'emancipacion de las nations europencas.
Quand lo contrapè fa avançar! S'unir avent per tòca de se desligar a long long térme aquò qu'es de bona dralha dins l'andróna qu'es la societat actuala! Que fonccione! Anèm quitament se sap pas onte!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari