Se presentèt ièr al Parlament de Catalonha los detalhs de la lei del referendum d’independéncia de Catalonha e Aran del 1r d’octòbre que ven. De deputats de Junts pel Sí (Amassa per l’Òc) e de la CUP se partegèron l’explicacion del tèxt. Puèi, de ser, un acte simbolic se tenguèt al Teatre Nacional de Catalonha.
 
L’avantdire d’aquela lei remanda a las resolucions de l’ÒNU e del Tribunal de l’Aia per justificar la legalitat del referendum per la via unilaterala, davant lo refús de Madrid.
 
Segon aquela lei, se dins lo referendum ganha l’”òc” se proclamarà immediatament l’independéncia, e començarà sul pic lo procès constituent per la formacion de la Republica de Catalonha e Aran. “Se ganha lo «non» beurem d’Aiga del Carme e se convocarà d’eleccions” al Parlament de Catalonha, çò diguèt Gabriela Serra, de la CUP, en referéncia a la licor tradicionalament emplegada per garir totes los malaises.
 
Tota la procedura del referendum la regularà la Sindicatura Electorala Nacionala, compausada de cinc juristas designats pel Parlament de Catalonha sus proposicion dels grops parlamentaris. Aquela sindicatura validarà lo recensament electoral, qu’elaborarà lo govèrn catalan a manca de las donadas que l’estat vòl pas fornir. A partir d’aquel recensament se farà un tiratge al sòrt per designar los membres dels burèus de vòte.
 
Aquel recensament electoral serà compausat de totes los electors que residisson en Catalonha e Aran, e a l’exterior, amb drech de votar. “Son cridats a participar al referendum las personas qu'an drech de vòte a las eleccions al Parlament de Catalonha”.
 
Es previst un decret de convocacion del referendum. Un document que l’estat espanhòl espèra per poder agir judiciàriament contra las autoritats convocantas. Aquel decret, qu’an pas precisat quora serà public, serà acompanhat de las nòrmas complementàrias qu’establiràn, demest d’autras causas, lo modèl de las bilhetas, las ressorsas, los materials necessaris e las condicions.
 
Se las comunas cedisson pas d’espacis pel referendum, la Generalitat ne porgirà. I aurà una sola circonscripcion.
 
Aquela lei prevei de participacion minima per considerar inalienables los resultats. Totun, segon la deputada Marta Rovira, “lo succès del referendum depend d’una participacion nauta; d’una campanha amb de representativitat de l’«òc» e del «non» e d’una interpretacion del resultat facha amb normalitat e representativitat”.
 
 
Un sit web, tanben en occitan
 
Ara, lo govèrn de Catalonha farà una virada per 200 municipalitats del territòri per explicar totes los detalhs del referendum. En mai d’aquò, met en marcha un sit web nomenat garanties.cat per que los ciutadans pòscan consultar totes los detalhs d’aquel vòte talament important de l’istòria de Catalonha e Aran. Lo sit, qu’es tanben previst en occitan, deu aver un servici d’atencion als ciutadans fornit per una còla de juristas e de foncionaris que resolveràn los dobtes dels ciutadans.


 






La vicepresidenta del govèrn espanhòl declarèt qu'aqueste paralisariá la lei del referendum en 24 oras

 


Çò que ne ditz la premsa internacionala
 
— Reuters: Catalonia to split from Spain within 48 hours of secession vote – referendum draft bill
 
— Asia News Network: Catalonia to declare immediate independence if ‘yes’ wins referendum
 
— BBC: Catalan independence: Plan for quick split from Spain after vote
 
— The Indian Express: Catalonia to declare immediate independence if yes vote wins referendum
 
— Euronews: Cataluña independiente en 48 horas si gana el SI
 
— RTL: Catalogne: en cas de “oui” au référendum, indépendance immédiate
 
— Politico: Catalans rile Madrid with ‘self-determination law’
 
— Libération: «Si une majorité des votes est en faveur de la création d’une république catalane, il faudra déclarer l’indépendance.»
 
— La Libre Belgique: Carles Puigdemont: “Rien n’empêchera la Catalogne de décider de son avenir”
 
— Clarín: Si gana el Sí en el referéndum, Cataluña declarará la independencia de inmediato
 
— L’Express: Catalogne: un “oui” au référendum déclencherait l’indépendance, selon les séparatistes
 
— ANSA: Catalogna: con il sì repubblica in 48 h
 
— Radio Popolare: Catalogna: bye bye Spagna?
 
— JC Online: Catalunha planeja declarar independência em 48h
 
— O Globo: Com vitória do ‘sim’, Catalunha vai declarar independência na hora
 
— La Tribune: La Catalogne déclarera immédiatement son indépendance en cas de “oui” au référendum
 
— Swiss Info: Katalonien will sofortige Unabhängigkeit bei einem Ja in Abstimmung
 
— Aftonbladet: Katalonien utropar självständighet vid ja