Un nòu ensag militar de la Corèa del Nòrd a chepicat qualques païses. Dins la matinada de diluns a dimars aurián lançat un missil intercontinental qu’arribèt dins la mar de Japon.  La fusada volèt trenta nòu minutas e atenguèt una nautor de 2800 mètres.
 
Segon la television nòrd-coreana, s’agís d’un missil Hwasong-14, de portada intercontinentala qu’an lançat amb un suènh maximal e qu’a pas agut cap d’efièch negatiu pels païses vesins. De son costat, lo govèrn rus assegura dins un comunicat que s'agís d'un projectil de portada mejana, segon “los paramètres de vòl”. Totun, segon qualques expèrts estatsunidencs, lo projectil poiriá arribar fins a Alaska.
 
 
De protèstas dels estats de l’entorn
 
Tant Japon coma la Corèa del Sud an protestat per aquel nòu ensag que Gim Jeongeun (Kim Jong-un) a fach qualques jorns après la reünion que lo nòu president sud-corean e Donard Trump tenguèron a Washington.
 
Mentretant China, de l’ÒNU estant, insistís al près dels coreans e dels estatsunidencs per que cèrquen un engatjament per rebaissar las tensions, e evitar que la situacion actuala pòsca aver de consequéncias desastrosas.
 
De son costat, lo president dels Estats Units a reagit sus Twitter, coma d’abitud. Trump s’es demandat “s’aquel tipe", en fasent referéncia a Gim Jeongeun, “a pas res melhor de far amb sa vida”, en tot ajustar que per el “es complicat de creire que la Corèa del Sud e Japon o pòscan suportar mai de temps aital. Benlèu China farà quicòm per metre fin de bon a aquela neciesa”.
 

North Korea has just launched another missile. Does this guy have anything better to do with his life? Hard to believe that South Korea.....

— Donald J. Trump (@realDonaldTrump) 4 de juliol de 2017

 

....and Japan will put up with this much longer. Perhaps China will put a heavy move on North Korea and end this nonsense once and for all!

— Donald J. Trump (@realDonaldTrump) 4 de juliol de 2017