Dins una operacion contra lo terrorisme antijosieu, un presumit terrorista es estat tuat a Estrasborg (Alsàcia) del temps que tres policièrs son estats ferits. An arrestadas almens dètz personas suspèctas d’aperténer a de grops islamistas salafistas.

L’operacion comencèt dissabte de matin, en Occitània (a Niça e Canas), e a l’encòp en Alsàcia e a l’entorn de París. Foguèt en Estrasborg que se faguèt fuòc entre la polícia e Jérémie Louis-Sidney; aquel feriguèt 3 policièrs e se faguèt tuar. Louis-Sidney aviá la ciutadaniá francesa, aviá sa residéncia principala a Canas mas, tanben, demorava dins un bastiment d’apartaments socials dins la capitala alsaciana.
 
Segon las recèrcas de la polícia, las emprentas trobadas sus la granada lançada contra un supermercat josieu a Sarcelles, dins la banlèga nòrd de París, lo 19 de setembre passat, son aquelas de Jérémie Louis-Sidney. L’ambaissador d’Israèl en França, Yossi Gal, aviá condemnat aquela “agression antisemita”. Sarcelles es una comuna francesa de qualques 60_000 estatjants al nòrd de París que compta una importanta comunautat josieva.
 
Lo ministre de l’interior francés, Manuel Valls, cambièt la data del sieu viatge en Qatar per poder seguir de près lo trabalh de la polícia, çò que soslinha l’importància de l’operacion per l’executiu francés.
 
Un suspècte es estat arrestat dins la region de París del temps qu’a Canas, una autra persona es estada interrogada. Lo nombre d’arrestats es d’un desenat aperaquí.
 
Segon lo Ministèri de l’Interior francés, aquela ret pòt èsser ligada a de combatents salafistas dins la guèrra de Siria.