Lo Mecanisme Europèu d’Estabilitat a pagats los primièrs 7,7 miliards d’èurosque correspondon als 8,5 miliards del tresen tròç del salvament financièr de Grècia. D’aquel argent, Atenas a separats 6,9 miliards per pagar lo deute del país, del temps que los 800 milions restants se consagraràn a afrontar d’arrierats “après lo 1r de setembre, amb la condicion que Grècia faga un progrès significatiu en emplegant sas pròprias ressorsas a la liquidacion dels pagaments en suspens e tanben al finançament del desremborsament aprovat”. Es a dire que se pagarà lo deute exterior, e los pagaments en suspens del país los deurà encara aprovar lo Conselh dels Governors del fons de salvament europèu.
 
Los ministres de l’economia e de las finanças de la zòna èuro pachèron lo 15 per junh passat un acòrdi per desblocar lo tròç de 8,5 miliards d’èuros per Grècia, mas diguèron que precisarián dins una reünion venenta las mesuras e las condicions per tal de convéncer d’un biais definitiu lo Fons Monetari Internacional (FMI) que participèsse a aquel programa.
 
L’FMI poiriá portar fins a 2 miliards de dolars, e mai se dependrà dels detalhs de la reestructuracion del deute que se deurà menar a bon tèrme a la fin del programa, en 2018. Aquela reestructuracion del deute la definiràn los païses de la zòna èuro.
 
Amb lo desremborsament aprovat divendres passat, lo fons de secors europèu cobrirà 39,4 miliards sul total dels 86 miliards d’èuros acordats pel darrièr salvament de Grècia, un país qu’a recebut fins ara 181,2 miliards d’èuros del fons de salvament europèu.