Gràcias a la comuna de Narbona, la Rampe-TIO presentarà  Molière d’Òc lo 27 de julhet que ven al Palais dels Archevesques de Narbona. Se tracta d’una adaptacion de Molière en occitan facha per Marcèu Esquieu que s’es representada per tot lo país amb grand succès.  Aqueste còp, l’òbra se representarà amb de sostítols en francés.
 
L’òbra d’Esquieu es qu’una adaptacion a l’occitana d’una pèça de Molière, Monsieur de Pourceaugnac. Dins l’istòria iniciala, Sénher Porcenhac es un gentilòme lemosin que se’n va a París per se maridar amb Julie, la filha d’un gentilòme parisenc. Es lo paire qu’a decidit aquel maridatge e mai se Julie es amorosa del jove Erast. Mas Julie, Erast e la serviciala metràn en plaça un estratagèma per desvalorizar l’òme lemosin e lo convéncer de fugir. Molière aprofiècha aquela situacion per i metre de scènas dramaticas e comicas ont denóncia la sufisença dels mètges e de las gents de París. Es tanben una pèça comica que ridiculiza los arquetipes diches “provincials” que, segon los parisencs, los aurián los occitans.
 
Amb l’adaptacion occitana, La Rampe-TIO invèrsa la situacion. L’istòria se passa dins una vila d’Occitània e Monsieur de Pourceaugny, un ric gentilòme parisenc, i ven per se maridar amb Julie. Aquí l’òbra se debana en occitan, e mai se Pourceaugny parla un francés plan ponchut. Se tracta d’una pèça per s’estraçar del rire qu’apond una valor sociala e umana e qu’interpèla la nòstra societat d’uèi.
 
La reservacion en linha es obligatòria e l’intrada serà sus presentacion del bilhet electronic estampat en cò vòstre. Per mai d’informacions e assisténcia a la reservacion, podètz jónher l’Ofici de Torisme de Narbona fins al 23 de julhet al telefòn +33(0)4 68 65 15 60.