La còla d’Òc Malhòrca an lançat una campanha per far de sòcis en tot prepausar un escotisson de 45 èuros per an, amb de reduccions pels menors, retirats e caumaires, e de tarifas especialas per de patrons e entitats.
 
Òc Malhòrca es la primièra associacion occitanista de l’illa e sa tòca es de i difusar la lenga e la cultura occitanas, e mai de far conéisser la cultura malhorquina en Occitània.
 
Per ara an organizat la Dictada Occitana en 2015, una conferéncia de Yan Lespoux e an mes en marcha de projèctes per la creacion de la Bibliotèca Occitana de Malhòrca (BÒC) e la Federacion d'Entitats Occitanistas dels Païses Catalans (FEDÒC). Tanben an previst d’organizar una vesita guidada de Palma en tot far un omenatge als felibres occitans e malhorquins.
 
E mai, l’associacion cèrca d’èsser lo ponch d’amassada occitanista de l’illa e de venir la referéncia per totes los malhorquins interessats per Occitània. Sosten tanben los projèctes culturals a prepaus de l’occitan o d’Occitània e ten de relacions amb las autras entitats occitanistas dels Païses Catalans, dont lo CAÒC e l’ADÒC, que gerís Jornalet.
 
Per que se venga sòci, an mes un formulari en linha. Per mai d’informacion, podètz escriure a ocmallorca(a)gmail.com.