Dissabte passat, moriguèt Maryam Mirzakhani a causa d’un cancèr de la popa. Aviá quaranta ans e èra considerada coma un engèni de las matematicas. En 2014, Mirzakhani venguèt la primièra persona iraniana a ganhar la medalha Fields, un guierdon prestigiós que s’autreja cada quatre ans e qu’es considerat coma lo prèmi Nobel de las matematicas.
 
Son decès a esmogut la comunautat scientifica. Dins aquel sens, lo president de l’Universitat d’Stanford (Estats Units), Tessier-Lavigne, ont ela trabalhava, diguèt que la professora èra un “modèl de seguir”. Segon lo president de l’universitat, l’òbra de Mirzakhani “perdurarà totjorn dins los milièrs de femnas qu’ela a inspiradas a trabalhar dins l’encastre de las matematicas”. Tessier-Lavigne remembrèt tanben que la professora Mirzakhani èra una persona umila qu’acceptava solament las reconeissenças perque pensava qu’encoratjarián d’autras personas a seguir son camin.
 
 
De reaccions en Iran
 
Sa mòrt a descadenat tanben fòrça reaccions en Iran, ont lo govèrn s’es remembrat d’ela e l’a reconeguda coma un simbòl nacional e coma un engèni. E mai s’aviá migrat als Estats Units, Mirzakhani se presentava totjorn coma iraniana e recordava qu’aviá estudiat a Teheran, en essent totun una femna, après la guèrra. Dins aquel país, sa trajectòria es un modèl d’emancipacion per mai d’una femna.
 
Maryam Mirzakhani se licencièt en matematicas en 1999 a l’Universitat de Tecnologia Sharif de Teheran e en 2004 aguèt son doctorat a Harvard. Puèi, acceptèt un emplec coma professora a Stanford. Desvolopèt sa carrièra dins los domenis de l’espaci de Teichmüller, la geometria iperbolica, la teoria ergodica e la geometria simplectica.
 
Dins lo vidèo que seguís, Mirzakhani parla de sa vida e de son trabalh.