Los veneçolans elegiguèron tornarmai Hugo Chávez coma president dimenge passat. Chávez atenguèt 54,4% dels vòtes, del temps que lo dirigent opausant Henrique Capriles Radonski n’aguèt 44,9%, près de dètz ponches de mens. La participacion foguèt tanben un recòrd, en arribant a près d’81% del cens electoral. Aquela d’aquí es la cinquena victòria de Chávez.

Chávez, qu’es al poder en Veneçuèla dempuèi 1998, a ganhat las successivas eleccions presidencialas en se presentant coma candidat de la coalicion del Grand Pòl Patriotic, qu’intègra lo Partit Socialista Unit de Veneçuèla (PSUV). Dempuèi lo balcon del Palais de Miraflores, un còp coneguts los resultats, Chávez qualifiquèt la victòria de “batalha perfiècha” e felicitèt l’oposicion per reconéisser los resultats.

“Lo candidat de la drecha a anonciat que reconeis la victòria bolivariana, çò qu’es un pas fòrça important en la construccion de la patz e de la convivéncia en Veneçuèla”, çò diguèt Chávez als milièrs de simpatizants que s’èran amassats davant la sedença presidenciala per escotar lo discors. Lo president faguèt tanben un apèl a l’oposicion per “trabalhar amassa per la Veneçuèla bolivariana”, e diguèt sos grandmercés especials “als 8 milions de veneçolans qu’an votat pel socialisme, la revolucion, l’independéncia, lo futur e la grandesa de Veneçuèla”.

Lo “chavisme” s’afrontava a Capriles, elegit per l’oposicion dins de primàrias istoricas, celebradas en febrièr passat, ont mai d’un vintenat de partits opausants se jonguèron jos l’etiqueta de la Plataforma per l’Unitat Democratica (MUD). Lo candidat opausant reconeguèt la desbranda electorala e demandèt a Chávez que governèsse per totes los veneçolans. “Èsser un bon president significa trabalhar per l’union de totes los veneçolans. Seriá plan que lo president legiguèsse amb grandesa l’expression del nòstre pòble, ara que i a un país amb dos vejaires”, e demandèt respècte pels sieus votants. “Avèm pas atengut la presidéncia, mas avèm obtengut l’engatjament, l’afeccion e l’amor de mai de sièis milions de veneçolans”, çò declarèt.