L’occitanista Jusèp M Boya es ara lo nòu director general de l’Agéncia Catalana de Patrimòni Cultural de la Generalitat de Catalonha. Foguèt nomenat dimars passat en tot prene la seguida d’Àlex Susanna, un escrivan e poèta fòrça sensibilizat amb Occitània e l’occitan.
 
Nascut a Les (Val d’Aran), Jusèp Boya es diplomat en geografia e istòria, especializat en istòria medievala a l’Universitat de Barcelona. Faguèt tanben d’estudis de museologia,  conservacion e gestion del patrimòni cultural a l’Universitat de Montréal (Quebèc). Fa partida del còrs dels conservators dels musèus de la Generalitat de Catalonha dempuèi 1988 e foguèt director del Musèu de la Val d’Aran entre los ans 1986 e 1990, cap del Departament de Gestion Museografica del Musèu d’Istòria de Catalonha entre 1996 e 2008, e responsable del projècte del Musèu Nacional d’Istòria, Arqueologia e Etnologia de Catalonha. Es lo cap del Servici dels Musèus e de la Proteccion dels Bens Mòbles del Departament de la Cultura de la Generalitat, dempuèi mai de 2011. Fa gaire, èra lo director del Musèu d’Istòria de Catalonha e responsable del projècte del Musèu Nacional d'Istòria, Arqueologia e Etnologia de Catalonha.
 
Sa nominacion es estada ben aculhida en Aran, mai que mai a un moment que lo petit país de cap de Garona prepara sa candidatura per venir Patrimòni de l’Umanitat per l’UNÈSCO.
 
 
Engatjat amb Occitània e l’occitan
 
 “Era unitat dera lengua e dera nacion occitana ei estat ua des mies granes linhes de trabalh”, çò explicava Boya a Jornalet en setembre de 2014. “Ja en 1984, quan trabalhaua en Musèu dera Val d’Aran, introdusiguè era grafia normalizada e era grana mapa d’Occitània”. L’istorian precisava qu’“en aqueth moment calie ua visualizacion deth hèt occitan, çò que mos portèc alavetz problèmes damb era classa politica aranesa, tant de dreta coma de quèrra”.