Un grop de cercaires del projècte Pale Red Dot a detectat un senhal misteriós de ràdio provenent d’una estela nana roja apelada Ross 128, que se tròba a onze ans lutz de la Tèrra, dins la constellacion de la Verge, çò rapòrta Newsweek.
 
La deteccion l’an facha per mejan de las observacions realizadas a l’observatòri d’Arecibo, en Puerto Rico, ont obsèrvan d’estelas nanas rojas per ensajar de i trobar de sistèmas planetaris o d’autres objèctes que se tròben dins lor orbita.
 
Après analisar las donadas obtengudas d’aquelas observacions, an detectat quicòm d’estranh: una d’aquelas estelas, Ross 128, a emeses de senhals de ràdio. Lo director del laboratòri de l’observatòri, Abel Méndez, a explicat que l’origina dels senhals es desconeguda. “Los senhals consistissián en de pulsions non polarizadas gaireben periodicas de naut debit. Cresèm que los senhals son pas d’interferéncias localas de radiofrequéncia, perque son d’exclusivitats de Ross 128”. Valent a dire que i a pas de senhals semblables detectats sus d’autras estelas pròchas.
 
Quala ne pòt èsser l’origina? Segon Méndez, poirián èsser “d’erupcions solaras” de l’estela, “d’emissions d’un autre objècte dins lo camp de vision de Ross 128”, o tot “simplament l’espet d’un satellit de nauta orbita”. Per ara i a pas cap de confirmacion de cap d’ipotèsi, e l’ipotèsi d’un senhal d’origina extraterrèstra sembla pas la pus probabla.